गावात सत्कार समारंभ संपन्न
सुरेश पाचभाई मारेगाव
मारेगाव: तालुक्यातील वेगाव गावातील दोन शेतकरीपुत्रांची भारतीय सैन्यात थेट निवड झाल्याने संपूर्ण गावात उत्साहाचे वातावरण निर्माण झाले आहे. प्रणव पुरुषोत्तम सुर व वैभव अनंता ताजने या दोघांनी सैन्यात निवड होऊन गावाचे नाव उज्ज्वल केले आहे. प्रणव सुर यांच्या वडिलांकडे चार एकर तर वैभव ताजने यांच्या वडिलांकडे पाच एकर शेती असून शेतकरी कुटुंबातील या तरुणांनी कठोर परिश्रमाच्या जोरावर ही यशस्वी वाटचाल साध्य केली आहे.
या दोन्ही नवोदित जवानांचा सत्कार सोहळा बुधवार, दि. २६ नोव्हेंबर २०२५ रोजी त्यांच्या राहत्या घरी मोठ्या उत्साहात पार पडला. मान्यवरांच्या हस्ते शाल, श्रीफळ देऊन त्यांचा गौरव करण्यात आला. कार्यक्रमाला सत्कार समिती अध्यक्ष किशोरजी ताटकोंडावार, गजाननराव खोले, बंडुजी मिलमिले, एल.आय.सी. अभिकर्ते विठ्ठलराव कळसकर, गुरुदेव प्रचारक पुंडलीकराव ताजने तसेच गावातील मान्यवर, नातेवाईक व मित्रपरिवार मोठ्या संख्येने उपस्थित होते.
कार्यक्रमाचे सूत्रसंचालन ग्रामरोजगार सहाय्यक योगेश्वर कापसे यांनी केले, तर आभारप्रदर्शन विठ्ठलराव कळसकर यांनी केले. या तरुणांच्या निवडीमुळे वेगाव गावासह पंचक्रोशीमध्ये अभिमानाची भावना व्यक्त होत असून सर्वत्र त्यांचे अभिनंदन केले जात आहे.