सुरेश पाचभाई मारेगाव
मारेगाव तालुक्यातील हिवरा (मजरा) येथे एका अल्पभूधारक शेतकऱ्याने कीटकनाशक प्राशन करून आत्महत्या केल्याची धक्कादायक घटना शुक्रवारी (28 नोव्हेंबर 2025) पहाटे समोर आली. धनराज वासुदेव काळे (वय 50) असे मृत शेतकऱ्याचे नाव असून त्यांच्या मृत्यूने परिसरात हळहळ व्यक्त केली जात आहे.
मिळालेल्या माहितीनुसार, पहाटे पाचच्या सुमारास धनराज काळे यांनी कीटकनाशक प्राशन केल्याचे कुटुंबीयांच्या लक्षात आले. त्यांनी तातडीने त्यांना वणी येथील खाजगी दवाखान्यात उपचारासाठी दाखल केले. तेथे प्राथमिक उपचारानंतर डॉक्टरांनी गंभीर प्रकृती पाहता त्यांना पुढील उपचारासाठी चंद्रपूर येथील दवाखान्यात हलविले. मात्र उपचारादरम्यान त्यांची प्राणज्योत मालवली.
काळे यांच्याकडे अंदाजे तीन एकर शेती असून त्यांच्या मागे पत्नी, एक मुलगा व विवाहित मुलगी असा परिवार आहे. अल्पभूधारक शेतकऱ्याने नैराश्येतून टोकाचे पाऊल उचलल्याची प्राथमिक माहिती समोर येत असून पुढील तपास मारेगाव पोलिसांकडून सुरू आहे.
या घटनेमुळे हिवरा (मजरा) गावात शोककळा पसरली आहे.