विविध कार्यक्रमांनी समाज प्रबोधनाची मेजवानी
सुरेश पाचभाई मारेगाव
मारेगाव:तालुक्यातील मार्डी येथे संत नगाजी महाराज जयंती महोत्सव विविध धार्मिक व सांस्कृतिक कार्यक्रमांसह उत्साहात साजरा करण्यात आला. दोन दिवस चाललेल्या या महोत्सवाने गावात अध्यात्मिक आणि समाज प्रबोधनाचा सुगंध दरवळला.
महोत्सवाची सुरुवात शुक्रवारी सकाळी घटस्थापनेने झाली. त्यानंतर सिंदी महागाव येथील गुरुदेव सेवा मंडळाच्या वतीने भजनांचा कार्यक्रम पार पडला. शनिवारी पहाटे ६ वाजता श्रींचा अभिषेक व पोथी पारायण संपन्न झाले. सकाळी १० वाजता संत नगाजी महाराज यांच्या पालखी मिरवणुकीचे आयोजन करण्यात आले असून विविध भजन मंडळांनी सहभागी होऊन मिरवणुकीची शोभा वाढवली.
दुपारी १ वाजता सप्तखंजेरी वादनाची परंपरा पुढे नेत कु. जान्हवीताई सोपान घुमे यांनी जाहीर समाज प्रबोधन कीर्तन सादर केले. त्यांच्या प्रभावी कीर्तनामुळे परिसरात भक्तिमय वातावरण निर्माण झाले.
या दोन दिवसीय महोत्सवाच्या यशस्वी आयोजनासाठी नाभिक युवा क्रांती बहुउद्देशीय संस्था आणि समस्त नाभिक समाजातील युवक-युवतींनी पुढाकार घेतला. निरंजन येसेकर, राजू चौधरी, नगाजी वाटकर, मनोज चौधरी, मनिष धाबेकर, गोलू दाभेकर, विकास क्षीरसागर, रमेश दर्वे, गणेश दर्वे, चेतन क्षीरसागर आदी समाज बांधवांनी मोलाचे परिश्रम घेतले.
कार्यक्रमाला तालुक्यातील नाभिक बांधव व भगिनींची प्रमुख उपस्थिती लाभली, हे विशेष. महोत्सवामुळे समाजात ऐक्य, भक्ती आणि प्रबोधनाचा संदेश पोहोचल्याचे आयोजन समितीने सांगितले.