बातमी ऐका (Marathi Voice Reader)
हैदर शेख, प्रतिनिधी, चंद्रपूर : ग्रहशांती आणि कालसर्पदोष निवारणाच्या नावाखाली एका २७ वर्षीय विवाहितेवर लैंगिक अत्याचार केल्याची संतापजनक आणि धक्कादायक घटना चंद्रपूर जिल्ह्यातील चिमूर तालुक्यातील भिसी येथे उघडकीस आली आहे. या प्रकरणी भिसी पोलिसांनी तत्परतेने कारवाई करत भोंदू महाराजासह त्याला मदत करणाऱ्या एकूण तीन आरोपींना बेड्या ठोकल्या आहेत.
शुभम खंगार असे अत्याचार करणाऱ्या मुख्य भोंदू महाराजाचे नाव असून, त्याला या कृत्यात साथ देणारे सचिन मोडक आणि तेजस वालकटे या दोघांचाही अटक करण्यात आलेल्यांमध्ये समावेश आहे.
पूजेच्या बहाण्याने पतीला पाठवले बाहेर
पीडित २७ वर्षीय महिलेच्या पतीची प्रकृती गेल्या काही दिवसांपासून सतत बिघडत होती. यावर उपाय म्हणून कुटुंबीयांनी गावातील शुभम महाराज याच्याशी संपर्क साधला होता. त्रासातून मुक्ती मिळवण्यासाठी शुभम महाराजाने घरात ‘ग्रहशांती’ आणि ‘कालसर्पदोष निवारण’ पूजा करण्याचे सुचवले.
रविवारी मध्यरात्रीच्या सुमारास पीडितेच्या घरात पूजेची तयारी करून विधी सुरू करण्यात आला. पूजा अंतिम टप्प्यात असताना भोंदू महाराज आणि त्याच्या साथीदारांनी कट रचून पीडितेच्या पतीला पूजेचे उर्वरित साहित्य आणण्याच्या बहाण्याने घराबाहेर पाठवून दिले. पती घराबाहेर पडताच, असहाय्यतेचा फायदा घेत भोंदू महाराज शुभम याने विवाहितेवर लैंगिक अत्याचार केला. या संपूर्ण प्रकारात सचिन मोडक आणि तेजस वालकटे यांनी त्याला मदत केली.
भिसी पोलिसांकडून तिघांनाही अटक
पती घरी परतल्यानंतर आणि आरोपी निघून गेल्यानंतर घाबरलेल्या पीडितेने घडलेला सर्व प्रकार कुटुंबीयांना सांगितला. यानंतर पीडितेने तत्काळ भिसी पोलिस ठाणे गाठून तक्रार नोंदवली. घटनेचे गांभीर्य ओळखून पोलिसांनी तात्काळ गुन्ह्याची नोंद केली आणि शोधमोहीम राबवून भोंदू महाराज शुभम खंगार, सचिन मोडक आणि तेजस वालकटे या तिघांनाही अटक केली.
