बातमी ऐका (Marathi Voice Reader)
पुणे : आयु्ष्यभराचा जोडीदार शोधण्यासाठी आजकाल अनेकजण मॅट्रिमोन साईटवर आपलं प्रोफाईल बनवतात. इथे अनेकांना लग्नासाठी योग्य जोडीदार मिळतातही आणि ते विवाहबंधनातही अडकतात. मात्र, काहीवेळा इथे एखाद्या अनोळखी व्यक्तीवर विश्वास ठेवणं भलतंच महागातही पडू शकतो. याचाच प्रत्यय देणारी एक धक्कादायक घटना पुण्यातील एका महिलेसोबत घडली.
पुण्यातील जनवाडी भागात राहणाऱ्या एका महिलेने विवाहविषयक संकेतस्थळावर स्वतःचे नाव नोंदवले होते. आरोपीने तिथे फ्रान्समधील एका नामांकित कंपनीत उच्च पदावर कामाला असल्याचे बनावट प्रोफाईल तयार केले होते. आरोपीने महिलेशी संपर्क साधून तिचा विश्वास संपादन केला आणि तिच्याशी लग्न करण्याची तयारी दर्शवली.
काही दिवसांनंतर आरोपीने महिलेला भेटण्यासाठी फ्रान्सहून भारतात येत असल्याचे सांगितले. नवी दिल्ली विमानतळावर उतरल्यानंतर, "सीमाशुल्क विभागाने माझ्याकडील ८ हजार युरो हे परदेशी चलन जप्त केले आहे. ही कायदेशीर कारवाई टाळण्यासाठी तातडीने पैसे जमा करावे लागतील," अशी भुलथाप त्याने महिलेला मारली.
त्याच्यावर आंधळा विश्वास ठेवून महिलेने वेगवेगळ्या कारणांसाठी आरोपीने दिलेल्या बँक खात्यांमध्ये टप्प्याटप्प्याने तब्बल २१ लाख ८९ हजार रुपये जमा केले. पैसे मिळाल्यानंतर आरोपीने संपर्क तोडला. महिलेने फोन केला असता त्याचा मोबाईल क्रमांक बंद आढळला. फसवणूक झाल्याचे लक्षात येताच महिलेने तात्काळ पोलिसांत धाव घेतली. सध्या वरिष्ठ पोलीस निरीक्षक उत्तम भजनावळे या प्रकरणाचा सखोल तपास करत आहेत.
लग्नाचे आमिष दाखवून आणि परदेशातून भेटायला येत असल्याचे सांगून महिलेची तब्बल २१ लाख ८९ हजार रुपयांची फसवणूक करण्यात आली. या प्रकरणी चतुःशृंगी पोलीस ठाण्यात अज्ञात आरोपीविरोधात माहिती तंत्रज्ञान (IT) कायद्यासह फसवणुकीचा गुन्हा दाखल करण्यात आला आहे. मॅट्रिमोनी वेबसाईट्स किंवा सोशल मीडियावर अनोळखी व्यक्तींवर सहज विश्वास ठेवू नका. कस्टम ड्युटी, महागड्या भेटवस्तू किंवा आपत्कालीन परिस्थितीचे कारण सांगून कोणी पैसे मागितल्यास तात्काळ सतर्क व्हा आणि सायबर पोलिसांशी संपर्क साधा, असं आवाहन पोलिसांनी केलं आहे.
