बातमी ऐका (Marathi Voice Reader)
Attack on Tiger Shroff: रविवारी सायंकाळी सातच्या सुमारास बॉलिवूड अभिनेता टायगर श्रॉफवर जीवघेणा हल्ला करण्यात आला. तीन जणांनी टायगरच्या बीएमडब्ल्यू कारवर समोरून गोळीबार केला. या हल्ल्यात टायगर श्रॉफच्या चालकासह अन्य एकजण गंभीर जखमी झाला. हल्ल्याची ही घटना उघडकीस येताच सिनेसृष्टीसह संपूर्ण महाराष्ट्रात खळबळ उडाली. या प्रकरणी पोलिसांनी आता तीन मुख्य हल्लेखोर आरोपींसह त्यांना मदत करणाऱ्या इतर चार जणांनाही बेड्या ठोकल्या आहेत. यात दोन तरुणींचा समावेश आहे.
आता या प्रकरणाचा तपास जसाजसा पुढे जात आहे, तसंतसं या प्रकरणात धक्कादायक खुलासे समोर येत आहेत. टायगर श्रॉफवर तीन जणांनी हल्ला केल्याचं व्हिडीओत आणि सीसीटीव्ही कॅमेऱ्यात कैद झालं असलं तरी हा हल्ला करण्याचा मूळ प्लॅन चार जणांचा होता. संबंधित चौथा आरोपी सेलिब्रीटीची रेकी करताना आरोपींसोबत होता. मात्र हल्ल्याच्या एक दिवस आधी मोठा कांड झाला. चौथा आरोपी पळून गेल्याची माहिती आहे.
पोलीस सूत्रांनी दिलेल्या माहितीनुसार, सुरुवातीला टायगर श्रॉफ हा हल्लेखोरांचा मूळ टार्गेट नव्हता. तर बॉलीवूडचा महानायक अमिताभ बच्चन, आमिर खान, अक्षय कुमार आणि सलमान खान असे टॉपचे अभिनेते हल्लेखोरांच्या टार्गेटवर होते. आरोपींनी त्यांच्या घराची रेकीही केली होती. मात्र चारही अभिनेत्यांना जास्त सिक्युरिटी होती, शिवाय हल्ला करणं अवघड होतं.
त्यामुळे हल्लेखोरांनी आपला मूळ प्लॅन बदलला. त्यांनी अशा अभिनेत्याला शोधलं, जो प्रसिद्धही असेल आणि त्याच्याभोवती सिक्युरिटीचा गराडा नसेल, हल्ला करायला सोपं असेल. यानंतर त्यांनी टायगर श्रॉफवर हल्ला करण्याचं नियोजन केलं. यासाठी त्यांनी गूगलवरून माहितीही काढली. सात दिवस टायगरची रेकी केली.
दरम्यान, दर रविवारी टायगर श्रॉफ जुहू येथील ग्राऊंडवर फुटबॉल खेळायला जातो, त्याच्यासोबत सिक्युरिटी नसते. केवळ चालक असतो, अशी माहिती हल्लेखोरांना मिळाली. त्यानुसार, त्यांनी सेल्फी काढण्याचा बहाणा करत टायगर श्रॉफवर गोळीबार करण्याचा प्लॅन केला. हा मूळ प्लॅन चार आरोपींनी मिळून तयार केला होता. मात्र हल्ला करण्याच्या आदल्या रात्री एक आरोपी पळून गेल्याची माहिती आहे. संबंधित आरोपीनं सिगरेट ओढण्याचा बहाणा केला आणि या तीन हल्लोखोरांपासून स्वत:ला वेगळं केलं.
