बातमी ऐका (Marathi Voice Reader)
पुण्यातील रुबी हॉल रुग्णालयातून शरद पवार यांच्या प्रकृतीबाबत अधिकृत माहिती देण्यात आली आहे. रुग्णालयाचे चेअरमन, मॅनेजिंग ट्रस्टी आणि मुख्य हृदयरोगतज्ज्ञ डॉ. पुरवेझ ग्रँट यांनी दिलेल्या निवेदनानुसार, शरद पवार यांची प्रकृती सध्या उत्तम आहे. उपचारांना त्यांनी चांगला प्रतिसाद दिला असून ते पूर्णपणे बरे झाले आहेत, असे डॉक्टरांनी स्पष्ट केले. त्यामुळे त्यांच्या आरोग्याबाबत सुरू असलेल्या चर्चांना आता अधिकृत विराम मिळाला आहे. आता त्यांना रुग्णालयातून मिळाला डिस्चार्ज देण्यात आला आहे. डॉ. ग्रँट यांनी सांगितले की, शरद पवार यांना आज रुग्णालयातून डिस्चार्ज देण्यात आला आहे. वैद्यकीय तपासणीनंतर त्यांची तब्येत स्थिर आणि समाधानकारक असल्याचे निष्पन्न झाले. डॉक्टरांच्या टीमने पुढील काही दिवस त्यांना पुरेशी विश्रांती घेण्याचा सल्ला दिला आहे. शरीराला पूर्णपणे तंदुरुस्त होण्यासाठी थोडा वेळ देणे आवश्यक असल्याचेही त्यांनी नमूद केले. त्यामुळे तत्काळ व्यस्त दिनक्रम सुरू करण्याऐवजी नियोजनबद्ध पद्धतीने पुढील कामकाज सुरू करावे, अशी सूचना करण्यात आली आहे. काही दिवसांच्या विश्रांतीनंतर शरद पवार हळूहळू आपल्या नियमित कामकाजाकडे वळतील आणि सार्वजनिक कार्यक्रमांनाही उपस्थित राहतील, अशी माहिती रुग्णालयाकडून देण्यात आली. त्यांच्या प्रकृतीत सातत्याने सुधारणा होत असल्याने समर्थक आणि कार्यकर्त्यांमध्ये समाधानाचे वातावरण आहे. वैद्यकीय टीमच्या मार्गदर्शनानुसार ते लवकरच नेहमीच्या दिनक्रमात परततील, असा विश्वास व्यक्त केला जात आहे. छातीत संसर्ग, खोकला आणि कफचा त्रास शरद पवारांना छातीत संसर्ग झाला होता त्यामुळे त्यांना खोकला आणि कफचा त्रास जाणवत होता. रुग्णालयात दाखल झाल्यानंतर त्यांच्या विविध वैद्यकीय तपासण्या करण्यात आल्या. सर्व तपासण्यांचे अहवाल समाधानकारक असल्याचे डॉक्टरांनी स्पष्ट केले होते. त्यांच्या ऑक्सिजनची पातळी आणि इतर जीवनावश्यक निकष सामान्य मर्यादेत असल्याचेही सांगण्यात आले होते. महत्त्वाचे म्हणजे, शरद पवार यांना अतिदक्षता विभागात ठेवण्यात आलेले नव्हते. ते रुग्णालयातील खासगी खोलीत उपचार घेत होते. डॉक्टरांच्या पथकाकडून त्यांच्यावर सतत लक्ष ठेवले जात होते. ते डॉक्टरांशी संवाद साधत होते तसेच भेटायला येणाऱ्यांशीही बोलत असल्याचे रुग्णालय प्रशासनाने सांगितले होते. त्यामुळे त्यांच्या प्रकृतीबाबत चिंता करण्याचे कारण नसल्याचे आधीच स्पष्ट करण्यात आले होते.
