पंचशील विद्यालयात सहविचार सभा; सर्व शारीरिक शिक्षकांचा उत्स्फूर्त सहभाग
सुरेश पाचभाई | मारेगाव
मारेगाव : तालुकास्तरीय क्रीडा स्पर्धांच्या आयोजनाला आता वेग आला असून, विद्यार्थ्यांच्या क्रीडा कौशल्याला योग्य व्यासपीठ उपलब्ध करून देण्यासाठी मारेगाव तालुका सज्ज होत आहे. स्पर्धांच्या नियोजनाला अंतिम दिशा देण्यासाठी पंचशील विद्यालय, नवरगाव येथे गुरुवार, ३ सप्टेंबर २०२६ रोजी महत्त्वपूर्ण सहविचार सभा उत्साहात पार पडली. तालुक्यातील शारीरिक शिक्षकांनी सभेला उत्स्फूर्त सहभाग नोंदवत स्पर्धा यशस्वी करण्यासाठी सहकार्याची भूमिका स्पष्ट केली.
सभेच्या अध्यक्षस्थानी पंचशील विद्यालयाचे मुख्याध्यापक ए. डी. चव्हाण सर होते. विद्यार्थ्यांमध्ये खेळाविषयी जागृती निर्माण करण्याची गरज अधोरेखित करत त्यांनी शारीरिक शिक्षकांना मार्गदर्शन केले. प्रमुख पाहुणे म्हणून तालुका क्रीडा संयोजक बी. एस. काकडे सर उपस्थित होते. यावेळी मुख्याध्यापक महाडुळे सर, ताजने सर आणि ठाकरे सर यांचीही प्रमुख उपस्थिती होती. कार्यक्रमाचे सूत्रसंचालन धनंजय ठेपाले सर यांनी केले.
नियोजनापासून वयोगटांपर्यंत सविस्तर मार्गदर्शन
तालुकास्तरीय क्रीडा स्पर्धांचे आयोजन, स्पर्धा घेण्याची पद्धत तसेच विविध वयोगटांबाबत बी. एस. काकडे सर यांनी सविस्तर मार्गदर्शन केले. स्पर्धा शिस्तबद्ध, पारदर्शक आणि नियोजनबद्ध पद्धतीने पार पाडण्यासाठी उपस्थित शारीरिक शिक्षकांनी विविध मुद्द्यांवर चर्चा केली. स्पर्धांच्या यशस्वी आयोजनासाठी आवश्यक ते सहकार्य करण्याची ग्वाहीही यावेळी देण्यात आली.
शारीरिक शिक्षकांचा उत्स्फूर्त सहभाग
सहविचार सभेस सतीश गौरकर सर, मेश्राम सर, लांडगे सर, देवाळकर सर, हिलगे सर, कुडमेथे सर आणि काळे सर यांनी विशेष सहकार्य केले. त्यांच्या सहभागामुळे आगामी क्रीडा स्पर्धांच्या नियोजनाला अधिक बळ मिळाले.
मारेगाव तालुक्यातील विद्यार्थ्यांच्या क्रीडा कौशल्याला व्यासपीठ मिळवून देण्याच्या दृष्टीने या सभेला महत्त्व प्राप्त झाले आहे. स्पर्धांचे नियोजन आता अंतिम टप्प्यात येत असून, आगामी काळात तालुकास्तरीय क्रीडा स्पर्धांमध्ये विद्यार्थ्यांचा उत्साह आणि क्रीडा कौशल्य पाहायला मिळणार आहे.
