बातमी ऐका (Marathi Voice Reader)
शेतकरी बांधवांसाठी आणि जमीनदारांसाठी भूमी अभिलेख विभागाने एक अत्यंत दिलासादायक निर्णय घेतला आहे. आता सातबारा (७/१२), ८-अ उतारा आणि मिळकत पत्रिका (Property Card) मिळवण्यासाठी सेतू केंद्र किंवा महा ई-सेवा केंद्रांचे खेटे मारण्याची अजिबात गरज नाही. ही सर्व महत्त्वाची कागदपत्रे आता थेट तुमच्या मोबाईलवर, म्हणजेच WhatsApp वर उपलब्ध होणार आहेत.
अनेकदा सेतू केंद्रांवर १५ रुपयांच्या उताऱ्यासाठी जास्त पैसे उकळले जायचे, तसेच तिथे तासनतास रांगेत उभे राहावे लागायचे. मात्र, आता ही संपूर्ण प्रक्रिया डिजिटल आणि पारदर्शक झाली असून, वेळ आणि पैशांची मोठी बचत होणार आहे.
महाभूमी पोर्टलला भेट द्या, सर्वात आधी महाराष्ट्र शासनाच्या महाभूमी या अधिकृत संकेतस्थळावर जा. त्यानंतर मोबाईल नंबर नोंदवा. संकेतस्थळावर जाऊन तुमचा ‘व्हॉट्सअॅप मोबाईल क्रमांक’ नोंदवा आणि केवळ १५ रुपये इतके माफक शुल्क ऑनलाईन भरा.
तिसरी आणि महत्त्वाची स्टेप थेट WhatsApp वर PDF डाउनलोड करा. नोंदणी यशस्वी होताच, तुमचा सातबारा किंवा ८-अ उतारा थेट तुमच्या व्हॉट्सअॅपवर डिजिटल स्वरूपात पाठवला जाईल. तिथून तुम्ही तो लगेच डाउनलोड करून वापरू शकता.
दलाली आणि अतिरिक्त खर्चाला आळा: १५ रुपयांचा उतारा मिळवण्यासाठी आता केंद्रांवर अतिरिक्त पैसे मोजावे लागणार नाहीत. उतारा थेट अधिकृत प्रणालीद्वारे व्हॉट्सअॅपवर येत असल्याने बनावट प्रती किंवा उताऱ्याच्या गैरवापराची शक्यता संपुष्टात येईल.
घरी बसून एका क्लिकवर दाखला मिळणार असल्याने शेतकऱ्यांचे श्रम आणि वेळ वाचेल. भूमी अभिलेख विभागातर्फे ही सुविधा सुरुवातीला काही जिल्ह्यांमध्ये प्रायोगिक तत्त्वावर सुरू करण्यात येत आहे. यातील यशोगाथेनंतर संपूर्ण महाराष्ट्रात टप्प्याटप्प्याने ही सेवा पूर्ण क्षमतेने लागू केली जाईल.
