जमिनीचे आरोग्य जपण्यासाठी कृषि विभागाचे आवाहन
सुरेश पाचभाई मारेगाव
मारेगाव:तालुका कृषि अधिकारी कार्यालय, मारेगाव यांच्या वतीने जागतिक मृदा दिनाचे औचित्य साधत वरुड गावात विशेष कार्यक्रमाचे आयोजन करण्यात आले. या निमित्ताने शेतकऱ्यांना जमिनीचे पोषण, मृदा संवर्धन व संतुलित खत व्यवस्थापनाबाबत मार्गदर्शन करण्यात आले.
कार्यक्रमात तालुका कृषि अधिकारी कु.दिपाली खवले यांनी मृदा दिनाचा इतिहास, उद्देश आणि महत्व यावर माहिती देत संतुलित खतांचा वापर, जमिनीचे योजनेपूर्वक व्यवस्थापन आणि जमिनीच्या आरोग्य जतनाचे महत्त्व पटवून दिले.
मंडळ कृषि अधिकारी किशोर डोंगरकार यांनी शेतकऱ्यांशी संवाद साधताना जमिनीतील सेंद्रिय कर्बाचे वाढते महत्व स्पष्ट केले. सेंद्रिय कर्ब वाढवण्यासाठी आवश्यक उपाययोजना, शेणखत-हिरवेखताचा वापर आणि पिकपद्धतीतील विविधता यावर त्यांनी मार्गदर्शन केले.
सहायक कृषि अधिकारी सचिन आत्राम यांनी शेतकऱ्यांना माती नमुना घेण्याची योग्य पद्धत तसेच ‘जमीन आरोग्यपत्रिका’ कशी समजून घ्यावी याबाबत सविस्तर माहिती दिली. तर सहायक कृषि अधिकारी निखिल पवार यांनी कृषि विभागाच्या विविध शासकीय योजनांची माहिती शेतकऱ्यांपर्यंत पोहोचवली.
या कार्यक्रमात शेतकऱ्यांना त्यांच्या जमीन आरोग्यपत्रिकांचे वाटप करण्यात आले. गावातील कृषि सखी मनीषा टोंगे आणि कृषि ताई काजल बट यांनी कार्यक्रमाचे उत्कृष्ट नियोजन व समन्वय साधला. कार्यक्रमाला मोठ्या संख्येने शेतकरी उपस्थित होते.
