बातमी ऐका (Marathi Voice Reader)
सोलापूर : केवळ पुस्तकी शिक्षणच नव्हे, तर योग्य माहिती आणि आधुनिक तंत्रज्ञानाचा वापर करून शेतीतही मोठे यश मिळवता येते, हे पंढरपूर तालुक्यातील शेवते येथील अमोल तुले या तरुण शेतकऱ्याने दाखवून दिले आहे. सोशल मीडियावरील व्हिडिओ पाहून दोडका पिकात केलेल्या एका नव्या प्रयोगामुळे अमोल यांना 2 लाख रुपयांचा निव्वळ नफा मिळाला आहे.
पारंपारिक पद्धतीने दोडक्याची लागवड
अमोल तुले यांनी सुरुवातीला पारंपारिक पद्धतीने दोडक्याची लागवड केली होती. मात्र, यामध्ये 500 किलो उत्पादनापैकी तब्बल 200 किलो दोडके वाकडे निघत होते. यामुळे बाजारात योग्य भाव न मिळाल्याने त्यांना मोठे नुकसान होत होते. या समस्येवर उपाय शोधण्यासाठी अमोल यांनी सोशल मीडियावर दोडका शेतीचे विविध व्हिडिओ पाहिले.
दोऱ्यांच्या आधाराने तंत्रज्ञान बदलले
सोशल मीडियावरील संकल्पनेतून प्रेरणा घेऊन अमोल यांनी मांडव आणि दोऱ्यांच्या सहाय्याने दोडक्याच्या वेलींना वर जोडले. यामुळे वेलींच्या मुळांपर्यंत सूर्यप्रकाश पोहोचू लागला आणि दोडके सरळ वाढू लागले. पूर्वी 500 किलोमागे 200 किलो वाकडे निघणारे दोडके आता केवळ 5 किलोच्या आत वाकडे निघत आहेत. यामुळे पिकाची गुणवत्ता लक्षणीयरीत्या सुधारली.
15 हजारांचे भांडवल आणि थेट कंपन्यांना विक्री
या लागवडीसाठी अमोल यांना केवळ 15 हजार रुपये खर्च आला होता. दर्जेदार आणि सरळ दोडका पिकल्याने त्यांनी स्थानिक बाजारात जाण्याऐवजी थेट रिलायन्स मॉल, ॲमेझॉन, झोमॅटो आणि बिग बास्केट यांसारख्या मोठ्या कॉर्पोरेट कंपन्यांना दोडक्याचा पुरवठा सुरू केला. सध्या त्यांच्या या उत्कृष्ट गुणवत्तेच्या दोडक्याला प्रति किलो 40 ते 60 रुपये इतका चांगला दर मिळत आहे.
अवघ्या 15 हजार रुपयांचा खर्च वजा जाता अमोल तुले यांना या दोडक्याच्या शेतीतून 2 लाख रुपयांचा निव्वळ नफा मिळाला आहे. सोशल मीडियाचा योग्य वापर करून अमोल यांनी साधलेली ही प्रगती तालुक्यातील इतर शेतकरी बांधवांसाठी प्रेरणादायी ठरत आहे.
