सुरेश पाचभाई मारेगाव
मारेगाव : तालुक्यातील विविध गावांमध्ये शेतकरी सभा व चर्चासत्रांच्या माध्यमातून गुलाबी बोंड अळी नियंत्रण तसेच हरभरा, तुर व रब्बी पिकांच्या एकात्मिक व्यवस्थापनाबाबत मार्गदर्शन करण्यासाठी तालुका कृषि अधिकारी कार्यालय, मारेगाव यांच्यावतीने विशेष मोहीम राबविण्यात येत आहे.
तालुका कृषि अधिकारी कु. दिपाली खवले यांच्या मार्गदर्शनाखाली सर्व सहाय्यक कृषि अधिकारी, उपकृषि अधिकारी व मंडळ कृषि अधिकारी यांच्या सहकार्याने ही माहितीपर मोहीम गावोगावी आयोजित करण्यात आली आहे. या सभांमधून शेतकऱ्यांना गुलाबी बोंड अळी व्यवस्थापन, हरभरा व गहू पिकावरील बीजप्रक्रिया, तसेच रब्बी हंगामातील पिकांचे तांत्रिक मार्गदर्शन देण्यात येत आहे.
नुकत्याच हिवरा मजरा येथे पार पडलेल्या सभेत मंडळ कृषि अधिकारी किशोर डोंगरकार यांनी कापूस पिकावरील बोंड अळीचे एकात्मिक व्यवस्थापन, हरभरा पिकावरील मर रोग, घाटे अळी व कटवर्म नियंत्रण, तसेच तुर पिकावरील विविध कीड व रोग व्यवस्थापनाबाबत मार्गदर्शन केले. यावेळी तालुका कृषि अधिकारी कु.दिपाली खवले यांनी ‘महाविस्तार एआय’ अॅपचा प्रभावी वापर, फळबाग लागवड, कृषि अन्न प्रक्रिया उद्योग व विविध योजनांची माहिती शेतकऱ्यांपर्यंत पोहोचवली.
सहायक कृषि अधिकारी नकुल थोरात यांनी सभेचे नियोजन करताना कृषि विभागाच्या विविध योजनांची सविस्तर माहिती दिली. या वेळी गावातील प्रगतीशील शेतकरी पुरुषोत्तम बुटे, अनंत निब्रड, दिवाकर गाडगे, विनोद ढेंगळे, कृषि सखी अंजली गाडगे, सुषमा ढेंगळे तसेच मोठ्या संख्येने शेतकरी उपस्थित होते.
