मुंब्रा पोलिसांचे ‘मिशन 48 तास’, सलग 2 दिवस अहोरात्र मोहीम:सुगावा नसताना 948 सीसीटीव्ही फुटेज पाहून 6 पथकांनी लावला सातवर्षीय चिमुरडीचा शोध

कोणताही तांत्रिक पुरावा नाही, मोबाइल लोकेशन नाही की तपासाचा ठोस धागा नाही… अशा अत्यंत आव्हानात्मक परिस्थितीत मुंब्रा पोलिसांनी केवळ ४८ तासांत आपल्या कौशल्याचे प्रदर्शन घडवले आहे. दिवा परिसरातून अचानक बेपत्ता झालेल्या अवघ्या ७ वर्षीय चिमुरडीचा पोलिसांनी बदलापूर येथे शोध घेऊन तिची सुखरूप सुटका केली. ठाणे ते बदलापूरदरम्यानच्या तब्बल ९४८ सीसीटीव्ही कॅमेऱ्यांचे फुटेज अत्यंत बारकाईने तपासून पोलिसांनी या गुन्ह्याचा छडा लावला. २८ मे रोजी रात्री ८:३० वाजताच्या सुमारास ही चिमुरडी राहत्या घराच्या परिसरातून अचानक गायब झाली होती. तिच्या वडिलांनी मुंब्रा पोलिस ठाण्यात तक्रार दिल्यानंतर, वरिष्ठ पोलिस निरीक्षक अनिल शिंदे आणि एसीपी प्रिया डमाले यांनी घटनेचे गांभीर्य ओळखून तात्काळ तपासाची चक्रे फिरवली. गुन्हे शोध आणि एनडीपीएसच्या ६ विशेष पथक व ५४ पोलिसांनी संपूर्ण परिसर पिंजून काढण्यास सुरुवात केली. पथकाने बदलापूर गाठून स्थानक परिसर आणि स्थानिक रिक्षाचालकांकडे चौकशी केली. अखेर सुमित शांताराम जाधव (३५) याची ओळख पटवून पोलिसांनी त्याच्या घरावर छापा टाकला त्या वेळी त्याच्या तीन मुलांसोबत चिमुरडी खेळत असल्याचे दिसून आले. जाधव यांच्या मुलीच्या बाबतीत गैरवर्तन झाल्याचा प्रकार घडला होता. या मुलीसोबत गैरकृत्य होऊ नये म्हणून त्यांनी तिला घरी आणल्याचे पोलिसांना सांगितले. खेळायच्या व शिकण्याच्या चिमुरडीवर घर कामाचे ओझे खेळायच्या आणि शिकण्याच्या वयात ७ वर्षांच्या चिमुरडीवर घरातील कामे व लहान बहिणीला सांभाळण्याची जबाबदारी लादली. याला मानसशास्त्रात बालपणाचे ‘पालकीकरण’ म्हणतात. पालकांच्या अज्ञानामुळे व सततच्या मारहाणीमुळे तिच्या मूलभूत ‘खेळण्याच्या अधिकारावर’ गदा आली. घरातून मिळणारा आनंद हिरावला गेल्यानेच तिने घर सोडले, ज्याचा गैरफायदा गुन्हेगारी पार्श्वभूमीमे इसम घेतात. अशा घटनांची पुनरावृत्ती टाळण्यासाठी आता तिच्या अशिक्षित पालकांचे समुपदेशन करणे अत्यंत गरजेचे आहे. त्यांना संवेदनशील बालसंगोपनाचे महत्त्व पटवून देणे, हाच या समस्येवरील खरा उपाय ठरेल असे तज्ज्ञांचे म्हणणे आहे. इनसाइट – पालकांकडून व्हायची मारहाण पोलिसांनी ७ वर्षीय चिमुरडीला विश्वासात घेऊन विचारपूस केली असता, बालमन हेलावून टाकणारे वास्तव समोर आले. साक्षीचे आई-वडील अशिक्षित असून ते तिच्याकडून घरातील कामे करून घ्यायचे आणि लहान बहिणीला सांभाळण्याची सक्ती करायचे. खेळायला वेळ न मिळणे आणि आई-वडिलांकडून सतत होणाऱ्या मारहाणीला कंटाळून या चिमुरडीने घर सोडल्याची धक्कादायक माहिती समोर आली आहे.