बातमी ऐका (Marathi Voice Reader)
पुण्याहून नागपूरच्या दिशेने निघालेल्या एका खासगी प्रवासी बसचा भीषण अपघात झाल्याची खळबळजनक घटना समोर आली आहे. छत्रपती संभाजीनगर शहरातील केंब्रिज चौकाजवळील पुलावरून जात असताना चालकाचे नियंत्रण सुटल्याने ही बस पुलाचा कठडा तोडून थेट पुलाखाली कोसळली. या हृदयद्रावक दुर्घटनेत एका प्रवाशाचा जागीच मृत्यू झाला असून, २० हून अधिक प्रवासी गंभीर जखमी झाले आहेत. जखमींमध्ये महिला आणि लहान मुलांचाही समावेश आहे.
पुलाचा कठडा तोडून बस थेट खाली कोसळली
मिळालेल्या माहितीनुसार, संबंधित खासगी ट्रॅव्हल्सची बस प्रवाशांना घेऊन पुण्याहून नागपूरकडे जात होती. प्रवासादरम्यान केंब्रिज चौकाजवळील पुलावर बस आली असता अचानक ही दुर्घटना घडली. बसने पुलाचा सुरक्षा कठडा तोडला आणि ती थेट पुलाखाली आदळली. अपघाताचा आवाज इतका मोठा होता की आसपासच्या परिसरातील नागरिकांनी तत्काळ घटनास्थळाकडे धाव घेतली.
एका प्रवाशाचा जागीच मृत्यू; महिलांसह लहान मुलं जखमी
या भीषण अपघातात बसचे मोठे नुकसान झाले असून, आत अडकलेल्या प्रवाशांमध्ये एकच आक्रोश माजला होता. दुर्दैवाने, या अपघातात एका प्रवाशाचा जागीच मृत्यू झाला, तर २० पेक्षा अधिक प्रवासी जखमी झाल्याची माहिती आहे. जखमी झालेल्यांमध्ये महिला आणि लहान मुलांची संख्या मोठी आहे.
घटनेची माहिती मिळताच स्थानिक नागरिक आणि पोलीस प्रशासनाने तातडीने बचावकार्य सुरू केले. बसमधून जखमी प्रवाशांना बाहेर काढून तत्काळ उपचारासाठी जवळच्या रुग्णालयात दाखल करण्यात आले आहे. दरम्यान, या अपघाताचे नेमके कारण अद्याप स्पष्ट झाले नसून पोलीस पुढील तपास करत आहेत.
