बातमी ऐका (Marathi Voice Reader)
राष्ट्रवादी काँग्रेस (अजित पवार गट)चे ज्येष्ठ नेते आणि अन्न व नागरी पुरवठा मंत्री छगन भुजबळ यांना राज्यसभेची उमेदवारी न मिळाल्यानंतर त्यांच्या समर्थकांमध्ये नाराजीचे वातावरण निर्माण झाले आहे. नाशिक जिल्ह्यातील येवला शहरात “साहेब, निर्णय घ्या” अशा आशयाचे पोस्टर झळकल्याने राजकीय चर्चांना उधाण आले आहे. राज्यसभा निवडणुकीसाठी राष्ट्रवादी काँग्रेसने राजेंद्र जैन यांना उमेदवारी दिल्यानंतर भुजबळ समर्थकांमध्ये अस्वस्थता वाढल्याचे दिसून येत आहे. अनेक दिवसांपासून भुजबळ यांचे नाव राज्यसभा उमेदवार म्हणून चर्चेत होते. मात्र, अंतिम क्षणी पक्षाने वेगळा निर्णय घेतल्याने समर्थकांनी सार्वजनिकरित्या नाराजी व्यक्त करण्यास सुरुवात केली आहे. नेमके पोस्टरमध्ये काय संदेश? येवल्यात लावण्यात आलेल्या पोस्टरवर “साहेब, निर्णय घ्या” असा थेट संदेश देण्यात आला आहे. या पोस्टरमधून भुजबळ यांनी पुढील राजकीय भूमिका स्पष्ट करावी, अशी मागणी समर्थकांकडून केली जात असल्याचे बोलले जात आहे. त्यामुळे भुजबळ आगामी काळात कोणती भूमिका घेतात, याकडे राज्याच्या राजकीय वर्तुळाचे लक्ष लागले आहे. भुजबळांची सूचक प्रतिक्रिया राज्यसभा उमेदवारी न मिळाल्यानंतर छगन भुजबळ यांनीही नाराजीचे संकेत देणारी प्रतिक्रिया दिली होती. “अन्याय काय, हे चालायचंच. आज नाही तर उद्या, उद्या नाही तर परवा. पण लक्षात ठेवा, मी कबड्डीचा खेळाडू आहे, शतरंजचा खेळाडू नाही,” असे वक्तव्य त्यांनी केले होते. त्यांच्या या वक्तव्याची राजकीय वर्तुळात मोठी चर्चा झाली होती. महायुतीत वाढणार का दबाव? राज्यसभेच्या उमेदवारीवरून निर्माण झालेली नाराजी केवळ राष्ट्रवादीपुरती मर्यादित राहणार की त्याचे परिणाम महायुतीच्या राजकारणावरही दिसणार, याबाबत चर्चा सुरू झाली आहे. भुजबळ हे ओबीसी समाजातील मोठे नेतृत्व मानले जात असल्याने त्यांच्या समर्थकांच्या भावना पक्ष नेतृत्व कितपत गांभीर्याने घेते, हे आगामी काळात स्पष्ट होणार आहे. पुढील निर्णयाकडे सर्वांचे लक्ष सध्या छगन भुजबळ यांनी कोणतीही आक्रमक भूमिका घेतलेली नसली तरी समर्थकांच्या पोस्टरबाजीमुळे राजकीय संदेश स्पष्टपणे गेला आहे. राज्यसभा उमेदवारी हुकल्यानंतर भुजबळ शांत राहणार की पक्ष नेतृत्वाकडे आपली नाराजी अधिक ठळकपणे मांडणार, याबाबत उत्सुकता वाढली आहे. नाशिकच्या राजकारणात या पोस्टरबाजीची जोरदार चर्चा असून, येत्या काही दिवसांत भुजबळ यांची भूमिका निर्णायक ठरू शकते.
