बातमी ऐका (Marathi Voice Reader)
पुणे: राज्यात यंदा पावसाचे प्रमाण कमी राहिल्याचा फटका आता धान्य बाजारालाही बसू लागला आहे. रोजच्या जेवणातील महत्त्वाचा भाग असलेल्या ज्वारीच्या दरात मोठी वाढ झाली असून, पुण्यातील मार्केट यार्डमध्ये ज्वारीचे दर शंभरीपार गेले आहेत. उत्पादनात घट झाल्याने बाजारात ज्वारीची आवक कमी झाली आहे. दुसरीकडे, ग्राहकांकडून मागणी कायम असल्याने दरवाढ होत असल्याचे व्यापाऱ्यांनी सांगितले. अवघ्या एक ते दीड महिन्यांपूर्वी ५८ ते ६० रुपये किलो मिळणारी पहिल्या प्रतीची ज्वारी आता ९५ ते १०० रुपये किलो झाली आहे. त्यामुळे सर्वसामान्य ग्राहकांच्या खिशाला महागाईची झळ बसत आहे.
पुणे मार्केट यार्डमधील नितीन कुमार अँड कंपनीचे नितीन नहार हे गेल्या ४० वर्षांपासून धान्य व्यवसायात आहेत. त्यांच्या म्हणण्यानुसार, यंदा देशभरात पावसाचे प्रमाण कमी राहिल्याने ज्वारीच्या उत्पादनावर परिणाम झाला आहे. शेतकऱ्यांकडेही ज्वारीचा पुरेसा साठा नसल्याने बाजारात आवक घटली आहे. परिणामी, ज्वारीच्या किमतीत मोठी वाढ झाली आहे.
नोकरीचा नाद सोडला अन् सुरू केली खेकडा शेती, सांगलीच्या इंजिनिअरची लाखोंची कमाई, पैशाचा फॉर्म्युलाच सांगितला…
मार्केट यार्डमधील ज्वारीच्या दरात सप्टेंबर आणि ऑक्टोबर महिन्यात मोठा फरक दिसून येत आहे. सप्टेंबरमध्ये पहिल्या प्रतीच्या ज्वारीचा दर ५८ ते ६० रुपये किलो होता. ऑक्टोबरमध्ये तो वाढून ९५ ते १०० रुपये किलो झाला आहे. दुसऱ्या प्रतीच्या ज्वारीचे दरही ४५ ते ५० रुपयांवरून ६० ते ६५ रुपये किलोपर्यंत पोहोचले आहेत. तर दुरई ज्वारीचे दर २७ ते ३० रुपयांवरून ३७ ते ४५ रुपये किलो झाले आहेत.
क्विंटलच्या हिशेबाने पाहिल्यास, पहिल्या प्रतीच्या ज्वारीचे दर सप्टेंबरमध्ये ५,८०० ते ६,००० रुपये होते. आता ते ९,५०० ते १०,५०० रुपयांपर्यंत पोहोचले आहेत. त्यामुळे ज्वारी खरेदी करताना ग्राहकांना अधिक पैसे मोजावे लागत आहेत.
ज्वारीच्या दरातील वाढ लगेच कमी होण्याची शक्यता नसल्याचे व्यापाऱ्यांचे म्हणणे आहे. साधारण नऊ महिन्यांनंतर पुढील हंगामातील ज्वारीची उपलब्धता वाढण्याची अपेक्षा आहे. मात्र, नवीन ज्वारी बाजारात येण्यासाठी सुमारे १४ ते १५ महिन्यांचा कालावधी लागू शकतो, असे नहार यांनी सांगितले. त्यामुळे तोपर्यंत ज्वारीचे दर कमी होतीलच, असे सांगता येणार नाही.
