पोलिस भरतीसाठी तरुणींना महापालिका देणार ‘ट्रेनिंग’:क्लासचे शुल्क भरणे अशक्य असल्याने मनपाचा पुढाकार, संभाजीनगरात राज्यातील पहिलाच उपक्रम

राज्यामध्ये १५ हजार ६३१ पदांसाठी पोलिस भरती होत आहे. यामध्ये साडेचार हजारांपेक्षा अधिक जागा मुलींसाठी राखीव आहेत. यामध्ये छत्रपती संभाजीनगर शहरातील जास्तीत जास्त महिलांची निवड व्हावी यासाठी मनपाच्या महिला व बालविकास विभागाकडून शहरातील १८ ते ३३ वयोगटातील मुली व महिलांसाठी प्रशिक्षण देण्यात येणार आहे. प्रशिक्षणासाठी पात्र उमेदवारांकडून यासाठी अर्ज मागवण्यात आले आहेत. मनपा हद्दीतील रहिवासी, किमान १० वी उत्तीर्ण असलेल्या मुली व महिलांना या प्रशिक्षण दिले जाणार आहे. राज्यातील अशा प्रकारचा उपक्रम राबवणारी छत्रपती संभाजीनगर ही पहिलीच महापालिका असल्याचे मनपाच्या अधिकाऱ्यांनी सांगितले. महापालिकेने या उपक्रमाद्वारे महिलांना सुरक्षित, सक्षम व स्वावलंबी बनवण्याचा प्रयत्न सुरू केला आहे. प्रशिक्षणादरम्यान शारीरिक चाचणी, लेखी परीक्षा, मुलाखत या सर्व स्तरांवर मार्गदर्शन केले जाईल. अर्जासोबत रहिवासी दाखला, शैक्षणिक प्रमाणपत्रे, आधार कार्ड इत्यादी कागदपत्रे जमा करावी लागतील. निवड झालेल्या उमेदवारांना नाममात्र १० टक्के (२,५०० हजार रुपये) शुल्कासह नियोजित ठिकाणी प्रशिक्षण दिले जाणार आहे. प्रशिक्षणासाठी येत्या २२ डिसेंबरपर्यंत अर्ज भरण्याची मुदत महापालिकेच्या अधिकृत संकेतस्थळावर, तसेच विभागाच्या कार्यालयात संपर्क साधून ऑनलाइन अर्ज करता येणार आहेत. त्याासाठी २२ डिसेंबरपर्यंत मुदत आहे. मुदतीत अर्ज दाखल करण्याचे आवाहन महिला व बाल विकास विभागाने केले आहे. पोलिस भरती पूर्व प्रशिक्षण केंद्रांकडून २५ ते ३० हजार रुपये शुल्क आकारले जात आहे. यामुळे अनेक गरीब विद्यार्थिनी भरतीपासून वंचित राहण्याची शक्यता असल्याने हा उपक्रम सुरू केल्याचे मनपाच्या अधिकाऱ्यांनी सांगितले. पोलिस भरतीत राज्यात सर्वाधिक महिला शहरातील असतील – जी. श्रीकांत, आयुक्त, मनपा
शहरात पोलिस भरतीसाठी तयारी करणाऱ्या मुलींची संख्या मोठ्या प्रमाणात आहे. गरीब कुटुंबातील मुलींना खासगी क्लासेसचे २५ ते ३० हजार रुपये शुल्क भरणे अशक्य असल्याचे जाणवले. त्यामुळेच अशा मुलींसाठी आम्ही पोलिस भरतीचे प्रशिक्षण देण्याचा निर्णय घेतला आहे. यासाठी अर्ज मागवण्यात आले असून लेखी व मैदानी चाचणी घेऊन निवड प्रक्रिया पूर्ण केली जाणार आहे. यामुळे राज्यात होणाऱ्या भरतीमध्ये सर्वाधिक मुलींची संख्या ही आपल्या शहरातून असावी असा आमचा प्रयत्न आहे.