बातमी ऐका (Marathi Voice Reader)
सोलापूर : सासऱ्याने दिलेली एक भेट माणसाचे भाग्य कसे बदलू शकते, याचे अत्यंत दुर्मिळ आणि प्रेरणादायी उदाहरण पंढरपूर तालुक्यातील आष्टी गावात पाहायला मिळत आहे. सासरकडून मिळालेल्या अवघ्या एका शेळीच्या जिवावर जावयाने चक्क 40 शेळ्यांचा कळप तयार करत बंदिस्त शेळीपालनाचा यशस्वी व्यवसाय उभारला आहे. सिद्धेश्वर दशरथ सुळे असे या जिद्दी जावयाचे नाव असून, ते या व्यवसायातून दर सहा ते सात महिन्याला दोन ते तीन लाख रुपयांचा निव्वळ नफा कमवत आहेत. या संदर्भात अधिक माहिती सिद्धेश्वर सुळे यांनी लोकल 18 शी बोलताना दिली.
काही वर्षांपूर्वी सिद्धेश्वर सुळे यांच्याकडे जर्सी गाय होती. मात्र, पुरेसे उत्पन्न मिळत नव्हते आणि स्वतःची शेती नसल्याने जर्सी जनावरांसाठी चारा कुठून आणायचा, हा मोठा प्रश्न त्यांच्यासमोर होता. जावयाची ही अडचण पाहून त्यांच्या सासऱ्यांनी घरच्या घरी वापरासाठी सुरुवातीला एक गावरान शेळी भेट म्हणून दिली. सासऱ्याने दाखवलेल्या या विश्वासाचे जावयाने सोन्यात रूपांतर करायचे ठरवले. त्यांनी जर्सी गाय विकून पूर्ण लक्ष शेळीपालनावर केंद्रित केले.
गेल्या पाच वर्षांत सिद्धेश्वर यांनी अहोरात्र मेहनत घेऊन एका शेळीपासून 40 पेक्षा अधिक शेळ्या आणि बोकडांची पैदास आणि विक्री केली आहे. सध्या त्यांच्याकडे 35 हून अधिक शेळ्या आहेत. ते दर सहा-सात महिन्यांनी शेळ्या आणि बोकडांची विक्री करतात. बाजारात एका शेळीला 5 ते 7 हजार रुपये, तर बोकडाला 8 ते 27 हजार रुपयांपर्यंत चांगला भाव मिळतो. सासऱ्याच्या एका छोट्या मदतीने जावयाला आज आर्थिकदृष्ट्या सक्षम केले आहे.
शारीरिक त्रास आणि व्यवसाय खर्च कमी करायचा असेल, तर शेतकऱ्यांनी शेती किंवा इतर कामासोबत जोडव्यवसाय म्हणून शेळीपालन नक्की करावे, असा सल्ला सिद्धेश्वर सुळे देतात. सासरे आणि जावयाच्या या अनोख्या नात्याची आणि त्यांनी साध्य केलेल्या यशाची चर्चा आज संपूर्ण परिसरात रंगत आहे.
