बातमी ऐका (Marathi Voice Reader)
पु्ण्यातील प्रसिद्ध पर्यटन स्थळ असलेल्या सिंहगड किल्ल्याच्या घाट रस्त्यावर शनिवारी सायंकाळी एक दुचाकी दरीत कोसळून एक तरुण व तरुणी जबर जखमी झाले. दुचाकी चालकाचे नियंत्रण सुटल्यामुळे हा अपघात झाल्याची माहिती आहे. या अपघातानंतर जखमी तरुणी पाया पडते, मला लवकर दवाखान्यात घेऊन चला, अशी गयावया करताना दिसून आली. यासंबंधीच्या माहितीनुसार, पूजा चव्हाण व सौरव पासलकर अशी जखमी तरुण – तरुणीची नावे आहेत. हे दोघेही शनिवारी सिंहगड किल्ल्याच्या पर्यटनासाठी आले होते. किल्ला पाहिल्यानंतर सायंकाळी ते दुचाकीवरून खाली उतरत होते. ते सिंहगड घाटातील 11 हजार पॉईंट परिसरात आले असता तरुणाचे दुचाकीवरील नियंत्रण सुटले आणि दुचाकी थेट रस्त्यालगतच्या खोल दरीत कोसळली. हा अपघात एवढा भीषण होता की, दोघेही दरीमध्ये खूप दूरवर फेकल्या गेले. त्यात ते गंभीर जखमी झाले. या अपघाताची माहिती मिळताच वनविभाग, वन समितीचे कर्मचारी, स्थानिक नागरीक, आपत्ती व्यवस्थापन पथक व इतर पर्यटकांनी घटनास्थळी धाव घेतली. ज्या ठिकाणी अपघात घडला, ते ठिकाण अत्यंत खोल होते. जखमींपर्यंत पोहोचणे एक अवघड आव्हान होते. पण त्यानंतरही सर्वांनी एकदिलाने प्रयत्न करून अत्यंत दक्षतापूर्वक बचाव मोहीम राबवली. दोन्ही जखमींना दरीतून सुखरूप बाहेर काढले. या अपघातात तरुणाच्या डोक्याला गंभीर इजा झाली. तर तरुणीच्या पायाला जबर मार लागला. प्राथमिक तपासात तिचा पाय 2-3 ठिकाणी मोडल्याचे स्पष्ट झाले. पायात फ्रॅक्चर झाल्यामुळे तरुणीला जागेवर नीट बसताही येत नव्हते. ती वेदनाने अक्षरशः विव्हळत होती. पाया पडते मला लवकर रुग्णालयात घेऊन चला, अशी गयावया ती बचाव पथकातील कर्मचाऱ्यांना करत होती. त्यानंतर उपस्थितांनी तातडीने खासगी वाहनाच्या मदतीने त्यांना लगतच्या रुग्णालयात दाखल केले. तिथे दोघांचीही प्रकृती चांगली असल्याचे समजते. सिंहगडावर नेहमीच असते मोठी गर्दी दरम्यान, सिंहगड किल्ला हा पुण्यातील अत्यंत लोकप्रिय पर्यटनस्थळ आहे. तिथे दररोज मोठ्या संख्येने पर्यटक येथे भेट देतात. विशेषतः पावसाळा आणि सुट्टीच्या दिवशी घाट रस्त्यावर मोठी गर्दी होत असते. मात्र, घाटातील तीव्र वळणे, खोल दऱ्या आणि वेगाने वाहन चालवण्याच्या प्रकारांमुळे येथे वारंवार अपघात घडत असल्याचे समोर येते. यापूर्वीही सिंहगड घाट परिसरात अनेक अपघातांच्या घटना घडल्या असून प्रशासनाकडून पर्यटकांना सतर्कतेचे आवाहन करण्यात येत असते. वाहन चालवताना वेगावर नियंत्रण ठेवणे, सुरक्षेचे नियम पाळणे आणि धोकादायक ठिकाणी सेल्फी किंवा स्टंट टाळणे आवश्यक असल्याचे स्थानिकांकडून सांगितले जात आहे.
