बातमी ऐका (Marathi Voice Reader)
पुणे : रविवारी घराबाहेर पडणाऱ्या पुणेकरांसाठी एक महत्त्वाची बातमी आहे. केंद्रीय गृहमंत्री अमित शहा यांच्या दौऱ्यानिमित्त आज म्हणजेच रविवारी आणि सोमवारी वाहतूक व्यवस्थेत बदल करण्यात आले आहेत. सुरक्षेच्या कारणास्तव हे वाहतूक बदल करण्यात आले असून वाहनचालकांनी पोलिसांच्या सूचनांचं पालन करावं, असं आवाहन वाहतूक शाखेचे पोलीस उपायुक्त डॉ. संदीप भाजीभाकरे यांनी नागरिकांना केलं आहे.
पुणे जिल्हा परिषदेत आयोजित करण्यात आलेल्या कार्यक्रमानिमित्त जिल्हा परिषद परिसरातील दोराबजी मॉल ते हॉटेल ब्लू नाईल चौक हा मार्ग वाहतुकीसाठी पूर्णपणे बंद ठेवण्यात येणार आहे. कार्यक्रमासाठी येणाऱ्या नागरिकांनी एसजीएस मॉल, पूना क्लब, लेडीज क्लब, किराड चौक, पुणे पोलीस आयुक्तालय परिसरातील गल्ली, इस्कॉन मंदिर आणि ब्लू नाईल चौक येथे आपली वाहने लावावीत.
दोन दिवस ‘नो-पार्किंग’ असणारे प्रमुख मार्ग
लोहगाव येथील हवाई दलाचा तळ ते विमाननगर रस्ता, रामवाडी ते भारत फोर्ज कंपनी (मुंढवा) या रस्त्यावर दोन्ही दिवस सर्व प्रकारची वाहने लावण्यास सक्त मनाई करण्यात आली आहे. यासोबतच इतर काही भागांतही पार्किंगला मनाई असेल. यात कोरेगाव पार्क येथील नॉर्थ मेन रोड, जहांगीर हॉस्पिटल चौक, अभियांत्रिकी महाविद्यालय चौक, नेहरू मेमोरियल चौक, जंगली महाराज रस्ता, टिळक चौक, नामदार गोपाळ कृष्ण गोखले रस्ता (फर्ग्युसन रस्ता), वेधशाळेजवळील खुडे चौक, संगमवाडी ते येरवड्यातील शाहदावलबाबा चौक, डॉ. बाबासाहेब आंबेडकर चौक ते गोल्फ क्लब रस्ता आणि ५०९ चौक ते लोहगाव हवाई दलाचा तळ याचा समावेश आहे.
सोमवारचे विशेष वाहतूक बदल
अमित शहा यांच्या उपस्थितीत सोमवारी सदाशिव पेठेतील भारत इतिहास संशोधक मंडळ येथे कार्यक्रम आयोजित करण्यात आला आहे. या निमित्ताने सोमवारी सकाळी ९ वाजल्यापासून कार्यक्रम संपेपर्यंत टिळक रस्ता, महाराष्ट्र साहित्य परिषद, बादशाही हॉटेल आणि भरत नाट्य मंदिर परिसरात वाहने लावण्यास मनाई असेल. तसेच, सकाळी ७ वाजल्यानंतर किराड चौक ते नेहरू मेमोरियल हॉल चौक हा मार्ग वाहतुकीसाठी बंद ठेवण्यात येईल. या मार्गावरून प्रवास करणाऱ्या वाहनचालकांनी किराड चौक येथून जीपीओमार्गे हॉटेल ब्लू नाईल चौकात जावे आणि तेथून पुढे आपल्या इच्छितस्थळी प्रस्थान करावे, असे वाहतूक पोलिसांनी स्पष्ट केले आहे.
