बातमी ऐका (Marathi Voice Reader)
सोलापूर : पारंपरिक शेतीला आधुनिक तंत्रज्ञानाची आणि योग्य नियोजनाची जोड दिली, तर कमी खर्चात मोठे उत्पन्न मिळवता येते. हे सांगोला तालुक्यातील महूद येथील प्रगतिशील शेतकरी समाधान बाळासो सरक यांनी सिद्ध करून दाखवले आहे. त्यांनी आपल्या डाळिंबाच्या बागेत हिरव्या वांग्याचे आंतरपीक घेऊन अवघ्या तीन महिन्यांत खर्च वजा जाता 3 लाख रुपयांचा निव्वळ नफा कमावला आहे.
समाधान सरक यांनी तीन महिन्यांपूर्वी आपल्या तीन एकर डाळिंब बागेत आंतरपीक म्हणून स्थानिक आणि लोकप्रिय असलेल्या सांगोला वाणाच्या हिरव्या वांग्याची लागवड केली होती. लागवडीपूर्वी त्यांनी जमिनीची चांगली मशागत करून त्यात भरपूर शेणखत मिसळले. त्यानंतर गादीवाफे (बेड) तयार करून त्यावर मल्चिंग पेपरचे आच्छादन केले आणि रोपांची लागवड केली. या संपूर्ण लागवडीसाठी त्यांना सुमारे 30 हजार रुपये खर्च आला.
वांग्याच्या पिकावर प्रामुख्याने थ्रीप्स, भुरी आणि मर रोगाचा प्रादुर्भाव होण्याची शक्यता असते. या रोगांपासून पिकाचे संरक्षण करण्यासाठी सरक दर चार दिवसांनी नियमितपणे आवश्यक औषधांची फवारणी करतात. योग्य व्यवस्थापनामुळे पीक जोमदार आले असून, आतापर्यंत वांग्याचे चार तोडे पूर्ण झाले आहेत.
उत्पादित झालेल्या दर्जेदार वांग्याची विक्री सांगोला येथील बाजारपेठेत केली जात आहे. सध्या बाजारपेठेत या हिरव्या वांग्याला प्रति कॅरेट 1100 रुपये असा चांगला दर मिळत आहे. सुरुवातीचा 30 हजार रुपयांचा खर्च वजा करता, त्यांना आतापर्यंत तीन लाख रुपयांचे उत्पन्न मिळाले आहे. विशेष म्हणजे, या वांग्याचे तोडे पुढील सहा महिने सुरू राहणार असल्याने आगामी काळात या उत्पन्नात आणखी मोठी भर पडणार आहे. सरक यांच्या या यशस्वी प्रयोगाचे परिसरातील शेतकऱ्यांकडून कौतुक होत आहे.
