बातमी ऐका (Marathi Voice Reader)
पेट्रोल आणि डिझेलच्या वाढत्या किमतींमुळे आधीच हैराण झालेल्या पुणेकरांना आता महागाईचा आणखी एक झटका बसला आहे. पुण्यात सीएनजी आणि पीएनजीच्या दरात पुन्हा एकदा वाढ करण्यात आली आहे. ‘महाराष्ट्र नॅचरल गॅस लिमिटेड’ (MNGL) कडून मध्यरात्रीपासून ही दरवाढ लागू करण्यात आली असून सीएनजीच्या दरात किलोमागे 1 रुपयाची, तर घरगुती पीएनजीच्या दरात 85 पैशांची वाढ झाली आहे. या दरवाढीनंतर पुण्यात आता सीएनजीची किंमत 95.75 रुपये प्रति किलोवर पोहोचली आहे. नैसर्गिक वायूच्या खरेदी खर्चात वाढ झाल्यामुळे ही दरवाढ करावी लागल्याचे सांगण्यात येत आहे. डिझेल आणि एटीएफच्या निर्यात शुल्कात वाढ एकीकडे पुण्यात सीएनजी महागला असतानाच, दुसरीकडे केंद्र सरकारने डिझेल आणि एव्हिएशन टर्बाइन फ्युएल (एटीएफ) च्या निर्यातीवरील शुल्कात वाढ केली आहे. सरकारच्या नवीन नियमांनुसार, आता डिझेलच्या निर्यातीवर प्रति लिटर ₹14 आणि एटीएफच्या निर्यातीवर प्रति लिटर ₹12.50 शुल्क आकारले जाईल. देशांतर्गत बाजारात इंधनाचा पुरेसा पुरवठा राखता यावा आणि तेल कंपन्यांच्या अमर्याद निर्यातीवर नियंत्रण ठेवता यावे, यासाठी सरकारने हे पाऊल उचलले आहे. दरम्यान, पेट्रोलच्या निर्यात शुल्कात कोणताही बदल करण्यात आलेला नाही. पेट्रोल आणि डिझेलही महागणार? सरकारच्या या निर्णयानंतर सर्वसामान्य जनतेमध्ये पेट्रोल-डिझेलच्या किमती वाढणार का? अशी भीती निर्माण झाली आहे. मात्र, सध्या तरी वाहनधारकांनी घाबरण्याची गरज नाही. देशांतर्गत वापरासाठी विकल्या जाणाऱ्या पेट्रोल आणि डिझेलवरील सध्याच्या उत्पादन शुल्कात कोणताही बदल करण्यात आलेला नाही, असे सरकारने स्पष्ट केले आहे. त्यामुळे या निर्णयाचा थेट परिणाम पेट्रोल पंपावरील किमतींवर होणार नाही. भविष्यात किमती कधी वाढू शकतात? इंधनाच्या किमती केवळ निर्यात शुल्कावर ठरत नाहीत. आंतरराष्ट्रीय बाजारातील कच्च्या तेलाच्या किमती, डॉलरच्या तुलनेत रुपयाची घसरण आणि जागतिक भू-राजकीय तणाव यावर पेट्रोल-डिझेलचे दर अवलंबून असतात. सध्याच्या निर्णयामुळे तात्काळ दरवाढ होणार नसली, तरी आंतरराष्ट्रीय बाजारात कच्च्या तेलाचे दर असेच वाढत राहिल्यास भविष्यात पेट्रोल-डिझेलच्या किमतींवर दबाव वाढून दर वाढू शकतात, असे तज्ज्ञांचे म्हणणे आहे. कोकरोच जनता पार्टीचा आज नागपुरात एल्गार: जयपूरच्या थप्पड प्रकरणानंतर अभिजीत दिपके मैदानात, फॉलोअर्स घटल्याची चर्चा देशात सध्या गाजत असलेल्या पेपर लीक प्रकरणाचे पडसाद आता नागपुरात उमटणार आहेत. या प्रकरणावरून ‘कोकरोच जनता पार्टी’ आक्रमक झाली असून, आज नागपुरात मोठ्या आंदोलनाची हाक देण्यात आली आहे. या आंदोलनाचे नेतृत्व करण्यासाठी कोकरोच जनता पार्टीचे संस्थापक अभिजीत दिपके आज सकाळीच नागपूरमध्ये दाखल झाले आहेत. त्यांच्या उपस्थितीत आज शहरातील संविधान चौकात दुपारी ४ वाजता हे आंदोलन पार पडणार आहे. सविस्तर वाचा
