ऐतिहासिक वारसा जपावा:पानगावच्या शिवकालीन अष्टकोनी हत्ती तलाव नूतनीकरण व सुशोभीकरणासाठी निधी द्यावा

तालुक्यातील पानगाव येथील ऐतिहासिक शिवकालीन अष्टकोनी हत्ती तलाव हा एक अत्यंत महत्त्वाचा ऐतिहासिक आणि वास्तुकलेचा अद्भूत वारसा आहे. या जलाशयाच्या नूतनीकरणासाठी निधी उपलब्ध करून देण्याची मागणी येथील पर्यावरण प्रेमी ॲड.प्रशांत शेटे यांनी जिल्हा प्रशासनाकडे केली आहे. जिल्हाधिकारी कार्यालयात उपजिल्हाधिकारी अंजली मरोड यांच्या उपस्थितीत झालेल्या बैठकीत ॲड. प्रशांत शेटे आणि सामाजिक कार्यकर्ते अंकुश वाघमारे यांनी पानगाव येथील ऐतिहासिक शिवकालीन अष्टकोनी हत्ती तलावाच्या सुशोभिकरण व पर्यटन विकासासाठी शासन स्तरावर निधीची उपलब्धता करण्यात यावी याबाबत सकारात्मक चर्चा केली. यावेळी जलाशयाच्या दुरुस्ती व नूतनीकरणासाठी शासकीय निधी उपलब्ध करून देण्याची मागणी देखील ॲड.शेटे यांनी केली.हा जलाशय शिवकालीन असल्याने त्याचे ऐतिहासिक महत्त्व लक्षात घेता, स्थानिक शेती, पिण्याचे पाणी आणि पर्यावरण संरक्षणाच्या दृष्टीने त्याचे पुनरुज्जीवन आवश्यक असल्याचे यावेळी शेटे यांनी निदर्शनाला आणून दिले. सध्या जलाशय जीर्ण झाल्याने पाणी साठवण क्षमता घटली असून गाळ साचल्याने समस्या निर्माण होत आहे. जलसंपदा विभाग, स्थानिक ग्रामपंचायत आणि इतर संबंधित यंत्रणांच्या समन्वयाने लवकरात लवकर कार्यवाही करण्यावर चर्चा झाली. यावेळी उपजिल्हाधिकारी मरोड यांनी ॲड.शेटे यांनी केलेल्या मागणी बाबत संबंधित विभागांना निर्देश देण्याचे आश्वासन दिले. तलावाची ऐतिहासिक पार्श्वभूमी या तलावाला स्थानिक पातळीवर ”हत्ती तलाव” म्हणून ओळखले जाते, कारण शिवकाळात व मराठा साम्राज्याच्या काळात हत्तींना पोहण्यासाठी आणि पाणी पाजण्यासाठी याची निर्मिती करण्यात आली होती. हा तलाव ३०० बाय ३०० फूट आकाराचा असून पूर्णपणे अष्टकोनी पद्धतीचा आहे. प्राचीन जलव्यवस्थापनाचे हे एक उत्तम उदाहरण मानले जाते. तलावाचे बांधकाम मजबूत दगडी चिऱ्यांमध्ये केलेले असून, आजही त्याची रचना सुस्थितीमध्ये पाहायला मिळते. अनेक दशकांपासून गाळाने आणि झाडीझुडपांनी वेढलेल्या या ऐतिहासिक तलावाला पानगावकर ग्रामस्थांनी एकत्र येत मोठ्या प्रमाणावर श्रमदान करून स्वच्छ केले व पुनरुज्जीवित केले आहे.