बातमी ऐका (Marathi Voice Reader)
येथील कृषी उत्पन्न बाजार समितीमध्ये गुरुवारी “चिया सीड्स’ची (काळ्या-पांढऱ्या रंगाचे खाद्य बीज) तब्बल १४६ कट्ट्यांची मोठी आवक झाली. यावेळी चिया सीड्स उत्पादक शेतकऱ्यांना क्विंटलमागे जास्तीत-जास्त २१,१०० रुपये तर कमीत-कमी ८,००० रुपयांचा दर मिळाला. यासोबतच बाजारात २० कट्टे काळे जिरे (शहाजिरे) विक्रीसाठी आले होते, त्यालाही २१,२०० रुपयांपासून १७,१०० रुपयांपर्यंतचा चांगला भाव मिळाला. अकोला बाजार समितीने या सर्व दुर्मिळ व नवीन शेतपिकांच्या विक्रीची हक्काची व्यवस्था केल्यामुळे शेतकऱ्यांना थेट व्यापारी मिळाले आहेत. यामुळे दलालांची मध्यस्थी संपून शेतकऱ्यांच्या थेट खात्यात भरघोस पैसे जमा होत आहेत, जे विदर्भाच्या शेतीसाठी सुबत्तेचे लक्षण आहे. अँटीऑक्सिडंटचा खजिना पारंपरिक कपाशी आणि सोयाबीनचे उत्पन्न घटत असल्याने अकोल्यातील प्रयोगशील शेतकऱ्यांनी आता नगदी व औषधी पिकांचा नवा पर्याय शोधला आहे. ओमेगा-३ फॅटी ॲसिड, फायबर आणि अँटी-ऑक्सिडंट्सने भरपूर असलेल्या चिया सीड्सची मागणी जगभरात वाढली आहे. काळ्या जिऱ्याचा वापर औषधांमध्ये होत असल्याने बाजारात या पिकांना वर्षभर मागणी असते.
