खडकी टेकडीवर अपघात; रोही गंभीर जखमी, वनविभागाकडून तातडीने मदत
सुरेश पाचभाई | मारेगाव
मारेगाव : मारेगाव–यवतमाळ राज्य महामार्गावर वन्यप्राण्यांच्या सुरक्षिततेचा प्रश्न पुन्हा ऐरणीवर आला आहे. खडकी ते बुरांडा दरम्यानच्या खडकी टेकडी परिसरात शुक्रवारी (दि. २० नोव्हेंबर) रस्ता ओलांडणाऱ्या रोह्याला अज्ञात वाहनाने जोरदार धडक दिली. या अपघातात रोही गंभीर जखमी झाला. घटनेनंतर वाहनचालक घटनास्थळावरून निघून गेल्याचा प्राथमिक अंदाज असून, नागरिकांच्या सतर्कतेमुळे जखमी वन्यप्राण्याला वेळीच मदत मिळाली.
प्राप्त माहितीनुसार, खडकी टेकडी परिसरातून रोही रस्ता ओलांडत असताना भरधाव वेगाने आलेल्या अज्ञात वाहनाची त्याला धडक बसली. धडकेनंतर रोही रस्त्याच्या परिसरात जखमी अवस्थेत पडला होता. हा प्रकार लक्षात येताच परिसरातील नागरिकांनी घटनास्थळी धाव घेत वनविभागाला माहिती दिली.
घटनेची माहिती मिळताच बोटोनी येथील वनपाल सुरेश मुंडाले वनविभागाच्या पथकासह घटनास्थळी दाखल झाले. वनविभागाच्या कर्मचाऱ्यांनी जखमी रोह्याला प्राथमिक उपचार केले. पुढील उपचाराबाबत वनविभागाकडून कार्यवाही करण्यात आली.
वन्यजीवांच्या जीविताचा प्रश्न ऐरणीवर!
मारेगाव–यवतमाळ राज्य महामार्गालगत वनक्षेत्र असल्याने या मार्गावर रोही, हरीण यांसह विविध वन्यप्राण्यांचा वावर असतो. विशेषतः खडकी टेकडी आणि बुरांडा परिसरात वन्यप्राणी अन्न-पाण्याच्या शोधात किंवा नैसर्गिक अधिवासातून रस्ता ओलांडताना दिसतात. मात्र, वाहनांचा वेग आणि चालकांची असावधगिरी वन्यप्राण्यांच्या जीवावर बेतण्याची शक्यता वाढवत आहे.
वन्यप्राण्यांना धडक देऊन पळ काढू नका!
वन्यप्राण्याला वाहनाची धडक बसल्यास वाहनचालकांनी घटनास्थळावरून निघून न जाता तातडीने वनविभागाला माहिती देणे आवश्यक आहे. वन्यजीव संरक्षण कायद्याच्या तरतुदींचे पालन करणे प्रत्येकाचे कर्तव्य आहे. महामार्गावरून प्रवास करताना वाहनचालकांनी वेगमर्यादा पाळावी, वनक्षेत्रातून जाताना विशेष खबरदारी घ्यावी आणि रस्त्यावर वन्यप्राणी दिसल्यास वाहनाचा वेग नियंत्रित करावा.
वन्यजीवांचे संरक्षण ही केवळ वनविभागाची जबाबदारी नसून समाजातील प्रत्येक घटकाची सामूहिक जबाबदारी आहे. त्यामुळे महामार्गावरील वन्यप्राण्यांचा वावर लक्षात घेता संबंधित यंत्रणांनीही आवश्यक खबरदारीच्या उपाययोजनांकडे लक्ष देण्याची गरज व्यक्त होत आहे.