बातमी ऐका (Marathi Voice Reader)
महाराष्ट्र प्रवर्तक कुंदन ऋषीजी यांच्या सान्निध्यात, अर्हम विज्जा प्रणेते उपाध्याय प्रवर परमपूज्य प्रवीण ऋषीजी यांचा २०२६ मध्ये होणारा ‘समर्पण – सर्व कल्याण’ शिखर चातुर्मास सोहळ्याच्या तयारीचा शुभारंभ आनंदधाम परिसरात करण्यात आला. चातुर्मासासाठी उभारण्यात येणार असलेल्या ‘आनंद तीर्थ-समवशरण’ या मुख्य प्रवचन स्थळाच्या भूमीवर जैन परंपरेनुसार ‘क्षेत्र विशुद्धी’ हा मंगल विधी उत्साहात व भाविक वातावरणात झाला. हा समारंभ गुरु सुमती शिष्य उपप्रवर्तक अभिषेक मुनीजी, गुरु हेम शिष्य उपप्रवर्तक आशिष मुनीजी, गुरुवर्या विभाश्रीजी, साध्वी डॉ. आभाश्रीजी यांच्या पावन उपस्थितीत पार पडला.चातुर्मास सोहळ्याचे प्रमुख आधारस्तंभ सौरभजी परागजी बोरा यांच्या मातोश्री प्रमिलाबाई हेमराजजी बोरा व भगिनी डॉ. निलिमाजी बोरा यांच्या हस्ते जैन शास्त्रोक्त पद्धतीनुसार कलशपूजन व मंगल विधी पार पडले. अर्हम विज्जा प्रणेते उपाध्याय प्रवर पूज्य प्रवीण ऋषीजी यांनी विशेष प्रशिक्षित केलेल्या ‘कल्याण मित्र टीम’च्या माध्यमातून हा ‘क्षेत्र विशुद्धी’ कार्यक्रम यशस्वीरीत्या पार पडला. जैन आगम व शास्त्राधारित मंगल विधींमार्फत विविध सामाजिक व कौटुंबिक उपक्रम राबवण्याचे काम ही टीम करते. चातुर्मास समितीचे अशोक बोरा म्हणाले, उपाध्याय प्रवर पूज्य श्री प्रवीण ऋषीजी म.सा. यांचा २०२६ मधील चातुर्मास हा ‘शिखर चातुर्मास’ ठरणार असून, चार महिन्यांच्या या कालावधीत विविध धार्मिक प्रवचने, साधना शिबिरे, आध्यात्मिक उपक्रम व धर्मप्रभावना कार्यक्रमांचे आयोजन करण्यात येणार आहे. आनंदधाम येथील वाढती भाविकसंख्या लक्षात घेऊन शेजारील विस्तीर्ण पटांगणावर ५० हजार चौरस फूट क्षेत्रफळाचा भव्य समवशरण मंडप उभारण्यात येत आहे. भाविकांच्या सुविधेसाठी २५ हजार चौरस फूट क्षेत्रफळाचे अद्ययावत भोजनगृह उभारले जात आहे. संपूर्ण चातुर्मासात गुरुदेवांचे वास्तव्यास्थान आनंदधाम हेच राहणार असून, तेथे विविध साधना शिबिरे देखील पार पडतील. कालपासून या भव्य मंडप उभारणीच्या कामाला प्रत्यक्ष सुरुवात झाली आहे.याप्रसंगी अशोक बोरा, राजेश भंडारी, आदेश चंगेडिया, विलास कटारिया, अनिल पोखरणा, सुरेश कांकरिया, मनसुख गुंदेचा, राजकुमार बोरा, सचिन देसरडा, विजय गुगळे, अभय गांधी, अभिजीत गांधी, विनोद कटारिया, अनिल कटारिया, कांतिलालजी गांधी, दिलीप मेहेर, संदीप गांधी, अतुल शिंगवी आदी उपस्थित होते.
