बातमी ऐका (Marathi Voice Reader)
राज्यात मराठा आणि ओबीसी आरक्षणाच्या मुद्द्यावरून सध्या वातावरण चांगलेच तापले असून, ओबीसींना मिळणाऱ्या सर्व सोयी-सुविधा मराठा समाजालाही लागू करण्याचा महत्त्वपूर्ण निर्णय राज्य सरकारने नुकताच घेतला आहे. एकीकडे मनोज जरांगे हे मराठा समाजाला ओबीसीतूनच आरक्षण मिळावे यासाठी सातत्याने आंदोलने करत आहेत, तर दुसरीकडे यामुळे मूळ ओबीसींवर अन्याय होईल अशी ठाम भूमिका ओबीसी नेते लक्ष्मण हाके यांच्याकडून मांडली जात आहे. याच संघर्षाच्या पार्श्वभूमीवर, लक्ष्मण हाके यांनी आता थेट मुख्यमंत्री देवेंद्र फडणवीस यांना मोठे आव्हान दिले असून, ‘ओबीसी समाज एकवटल्यास सत्ताधाऱ्यांना घरी बसावे लागेल’, असा इशारा दिला आहे. ओबीसींचे आरक्षण वाचवा लक्ष्मण हाके म्हणाले, तुमचा डीएनए ओबीसीचा असेल तर ओबीसींचे आरक्षण वाचवा, अन्यथा तुम्हाला घरी बसवावे लागेल. निवडणुकीत तुम्हाला बघून घेऊ. बेरोजगार तरुणांना झुरळ म्हणल्यावर देशातला जेन झी, कॉकरोच जनता पार्टीच्या रुपात एकवटले आहेत. आम्ही ओबीसी तर 60 टक्के आहोत. ओबीसी एकवटला तर सत्ताधारी, कारखानदार, भांडवलदार यांना घरी बसावे लागेल. जे ओबीसींनाते मराठा समाजाला हे आम्हाला मान्य नाही.ज्या दिवशी ओबीसी राजकीय भूमिका घेईल त्यादिवशी तुम्हाला पळता भुई थोडी होईल. ज्या दिवशी ओबीसी म्हणून ओबीसी एकत्र येईल, त्यादिवशी प्रस्थापित भांडवलदार, वतनदारांना घरी बसवू, असाही इशारा लक्ष्मण हाके यांनी दिला आहे. शासनाची वैचारिक दिवाळखोरी दरम्यान, माध्यमांशी बोलताना लक्ष्मण हाके म्हणाले होते की, ज्या योजना ओबीसींसाठी, त्याच योजना मराठा समाजाच्या विद्यार्थ्यांसाठी देण्याचा निर्णय झाला आहे. ज्या योजना ओबीसी समाजाला दिल्या आहेत, त्या अभ्यासपूर्ण आहेत. याच योजना मराठा समाजासाठी जाहीर करत आहेत, त्यामागचे लॉजिक आम्हाला कळले नाही. मराठा समाज त्या नियमांत बसतो का? ही तर शासनाची वैचारिक दिवाळखोरी आहे.
