पहाटेपासून दर्शनासाठी रांगा; ग्रामस्थांच्या सेवाभावामुळे भाविकांना दिलासा — १०५ वर्षांच्या परंपरेचा उत्साह शिगेला
सुरेश पाचभाई | मारेगाव
वणी : ‘नवसाला पावणारा गणपती’ म्हणून विदर्भासह महाराष्ट्राच्या विविध भागांत प्रसिद्ध असलेल्या बाबापुरच्या गणरायाच्या दर्शनासाठी भाविकांचा ओघ दिवसेंदिवस वाढत आहे. गणेशोत्सवाच्या तिसऱ्या दिवशीही पहाटेपासून बाबापुर येथील हनुमान मंदिर परिसर भाविकांनी गजबजून गेला असून, बाप्पाच्या दर्शनासाठी भक्तांच्या रांगा लागल्याचे चित्र पाहायला मिळत आहे.
दूरवरून आलेले भाविक कुटुंबासह दर्शनासाठी दाखल होत असून, परिसरात सर्वत्र गणरायाच्या जयघोषाने भक्तिमय वातावरण निर्माण झाले आहे. हातात पूजेचे साहित्य, मुखी गणरायाचे नामस्मरण आणि मनात नवसपूर्तीची श्रद्धा घेऊन भाविक बाबापुरचा रस्ता धरत आहेत.
‘बाप्पाच्या दर्शनाने मनोकामना पूर्ण होईल’!
बाबापुरच्या गणरायाबद्दल भाविकांमध्ये असलेली श्रद्धा हीच या उत्सवाची सर्वात मोठी ताकद आहे. अनेक भाविक नवस बोलून बाबापुरच्या गणरायाच्या चरणी येतात. मनोकामना पूर्ण झाल्यानंतर पुन्हा बाबापुरात येऊन बाप्पाचे दर्शन घेण्याची परंपराही अनेक कुटुंबांनी जपली आहे. त्यामुळे बाबापुरचा गणेशोत्सव हा केवळ धार्मिक उत्सव न राहता भाविकांच्या श्रद्धा आणि भावनांचा केंद्रबिंदू बनला आहे.
दर्शनासाठी नियोजन; सेवेसाठी ग्रामस्थ रस्त्यावर
भाविकांची वाढती गर्दी लक्षात घेऊन सार्वजनिक गणेश मंडळाचे पदाधिकारी, कार्यकर्ते आणि ग्रामस्थ अहोरात्र सेवेत कार्यरत आहेत. दर्शनासाठी येणाऱ्या भाविकांना कोणतीही गैरसोय होऊ नये, यासाठी विविध व्यवस्था करण्यात आली आहे. गर्दीचे नियोजन, भाविकांना मार्गदर्शन, आरोग्य सुविधा तसेच आपत्कालीन परिस्थितीसाठी ॲम्बुलन्सची व्यवस्था याकडे विशेष लक्ष देण्यात आले आहे.
‘भाविक आले म्हणजे ते आपल्या घरचेच पाहुणे’ या भावनेने ग्रामस्थ सेवेत सहभागी झाले आहेत.
भक्तीबरोबर अन्नदानातून सेवाभाव
गणेशोत्सवाच्या निमित्ताने बाबापुर येथे भक्तीबरोबरच अन्नदानातून सेवाभाव जपला जात आहे. बुधवार, दि. १६ सप्टेंबर २०२६ रोजी श्री. सुरेश बालाजी निकोरे, रा. शिरपूर यांच्या वतीने बाबापुर येथील मंदिरात येणाऱ्या भाविक तसेच ग्रामस्थांसाठी अन्नदानाचे आयोजन करण्यात आले आहे.गणरायाच्या दर्शनासाठी येणाऱ्या भक्तांना भोजनाची सेवा देत श्री. निकोरे यांनी सामाजिक बांधिलकी जपली आहे. त्यांच्या या अन्नदान उपक्रमामुळे दर्शनासाठी दूरवरून येणाऱ्या भाविकांना मोठा दिलासा मिळत असून, गणेशोत्सवातील सेवाभावाची परंपरा अधिक बळकट होत आहे.
भक्तीबरोबर सेवेलाही महत्त्व
बाबापुरच्या गणेशोत्सवाचे वैशिष्ट्य म्हणजे धार्मिक कार्यक्रमांसोबतच सामाजिक उपक्रमांनाही दिले जाणारे महत्त्व. गणेशोत्सवाच्या काळात आयोजित आरोग्य शिबिराचा लाभ ग्रामस्थ आणि भाविकांना मिळत आहे. तसेच नेत्र तपासणी व मोतीबिंदू ऑपरेशन शिबिरामुळे गरजू नागरिकांना मोठा दिलासा मिळणार आहे.
त्यामुळे बाप्पाचे दर्शन, अन्नदान आणि समाजसेवेचा संदेश असा दुहेरी संगम बाबापुरच्या गणेशोत्सवात पाहायला मिळत आहे.
दहा दिवस बाबापुर होणार भक्तीचे माहेरघर!
गणेशोत्सव जसजसा पुढे सरकत आहे, तसतसा भाविकांचा उत्साह वाढत आहे. सकाळची आरती, सामुदायिक ध्यान, सायंकाळची प्रार्थना आणि आरती यामुळे मंदिर परिसरात दिवसभर आध्यात्मिक वातावरण अनुभवायला मिळत आहे.
१०५ वर्षांची परंपरा लाभलेल्या बाबापुरच्या गणरायाच्या दर्शनासाठी येणाऱ्या भाविकांची संख्या आगामी दिवसांत आणखी वाढण्याची शक्यता आहे. त्यामुळे बाबापुर नगरी सध्या भक्तीच्या महासागरात न्हाऊन निघाली आहे.
१०५ वर्षांची परंपरा… नवसाला पावणाऱ्या गणरायाची श्रद्धा… ग्रामस्थांचा सेवाभाव… अन्नदानातून जपली जाणारी मानवसेवा… आणि वाढता भक्तिसागर!
बाबापुरच्या गणरायाचा हा भक्ती आणि सेवेचा प्रवास गणेशोत्सवाच्या पुढील दिवसांत आणखी रंगणार आहे.
