‘नवसाला पावणारा गणपती’ पाहण्यासाठी महाराष्ट्रासह परराज्यांतून भाविकांची मांदियाळी; १०५ वर्षांची अखंड परंपरा पुन्हा भक्तिसागरात
सुरेश पाचभाई | मारेगाव
वणी : ‘नवसाला पावणारा गणपती’ म्हणून विदर्भाच्या कानाकोपऱ्यात श्रद्धेचे स्थान निर्माण केलेल्या बाबापुरच्या गणरायाच्या दर्शनासाठी आज सकाळपासूनच भाविकांची अलोट गर्दी उसळली आहे. काल सायंकाळी बाबापुर येथील हनुमान मंदिरात गणरायाची विधिवत स्थापना होताच गणेशोत्सवाला भक्तिमय वातावरणात सुरुवात झाली. तब्बल १०५ वर्षांची अखंड परंपरा लाभलेल्या या गणरायाच्या दर्शनासाठी महाराष्ट्रासह परराज्यांतूनही भाविक बाबापुरकडे दाखल होत आहेत.
गणरायाच्या जयघोषाने बाबापुर नगरी दुमदुमून गेली असून, ‘गणपती बाप्पा मोरया’, ‘नवसाला पावणाऱ्या गणरायाचा विजय असो’ अशा जयघोषाने संपूर्ण परिसर भक्तिरसात न्हाऊन निघाला आहे. पहाटेपासूनच दर्शनासाठी रांगा लागल्याचे चित्र असून, दिवसभर भाविकांची संख्या वाढतच राहणार आहे.
नवस बोलला… आणि बाबापुर गाठले!
बाबापुरचा गणराय म्हणजे अनेक भाविकांच्या श्रद्धेचा विषय. मनोकामना पूर्ण होण्यासाठी नवस बोलणारे आणि नवसपूर्ती झाल्यानंतर गणरायाच्या चरणी माथा टेकण्यासाठी येणाऱ्या भाविकांची संख्या मोठी आहे. ‘बाबापुरचा गणपती नवसाला पावतो’ अशी श्रद्धा अनेक वर्षांपासून भाविकांच्या मनात रुजली असून, याच श्रद्धेच्या बळावर दरवर्षी हजारो नव्हे तर लाखो भाविक बाबापुरकडे आकर्षित होतात.
दूरवरून आलेल्या भाविकांच्या चेहऱ्यावर दर्शनाची आस, हातात नारळ-फुले आणि ओठांवर बाप्पाचे नामस्मरण… असे भक्तिमय चित्र सध्या बाबापुरमध्ये पाहायला मिळत आहे.
१०५ वर्षांचा वारसा; श्रद्धेची परंपरा कायम
बाबापुरच्या सार्वजनिक गणेशोत्सवाला यंदा १०५ वर्षे पूर्ण होत आहेत. पिढ्यान्पिढ्या ग्रामस्थांनी जपलेली ही परंपरा आजही त्याच उत्साहाने सुरू आहे. काळ बदलला, पिढ्या बदलल्या; मात्र बाबापुरच्या गणरायावरील भाविकांची श्रद्धा तसूभरही कमी झालेली नाही.
याच श्रद्धेमुळे गणेशोत्सवाच्या काळात बाबापुरला अक्षरशः यात्रेचे स्वरूप प्राप्त होते. पुढील दहा दिवस गावात भक्ती, उत्साह आणि सेवाभावाचा संगम अनुभवायला मिळणार आहे.
भाविकांच्या सेवेसाठी मंडळ सज्ज
भाविकांची वाढती गर्दी लक्षात घेऊन सार्वजनिक गणेश मंडळाच्या पदाधिकारी व कार्यकर्त्यांसह ग्रामस्थांनी दर्शन व्यवस्था आणि आवश्यक सुविधा सज्ज ठेवल्या आहेत. भाविकांची गैरसोय होऊ नये, यासाठी विविध पातळ्यांवर नियोजन करण्यात आले आहे. कायर-बाबापुर बससेवेचा लाभही भाविकांना मिळणार आहे. आपत्कालीन परिस्थितीसाठी आरोग्य सुविधा आणि ॲम्बुलन्सची व्यवस्थाही सज्ज ठेवण्यात आली आहे.
गणेशोत्सवाच्या निमित्ताने १५ ते २६ सप्टेंबरदरम्यान आरोग्य शिबिर, तर १८ सप्टेंबर रोजी मोफत नेत्र तपासणी व मोतीबिंदू ऑपरेशन शिबिराचे आयोजन करण्यात आले आहे. त्यामुळे भक्तीबरोबरच सामाजिक बांधिलकीची परंपराही मंडळाने कायम ठेवली आहे.
पहाटेच्या ध्यानापासून रात्रीच्या आरतीपर्यंत भक्तिमय वातावरण
उत्सव काळात दररोज पहाटे ५ वाजता सामुदायिक ध्यान, सकाळी ७.३० ते ८ वाजता आरती, सायंकाळी ६.३० वाजता सामुदायिक प्रार्थना आणि रात्री ७.३० ते ८ वाजता आरती असे धार्मिक उपक्रम सुरू राहणार आहेत. यासोबतच प्रवचन, प्रबोधन आणि विविध सामाजिक उपक्रमांचेही आयोजन करण्यात आले आहे.
बाबापुरकडे जाणारे रस्तेही भक्तिमय!
गणरायाच्या दर्शनासाठी भाविकांची संख्या दिवसेंदिवस वाढणार असल्याने बाबापुरकडे जाणाऱ्या मार्गांवरही गर्दी वाढण्याची शक्यता आहे. अनेक भाविक नवसपूर्तीसाठी कुटुंबासह बाबापुरकडे रवाना झाले आहेत. कुणी पायी, कुणी वाहनाने तर कुणी बसने बाबापुर गाठत असून, ‘बाप्पाच्या दर्शनाला जायचेच’ या भावनेने भाविकांमध्ये उत्साह संचारला आहे.
१०५ वर्षांचा वारसा… नवसाला पावणाऱ्या गणरायाची ख्याती…
आणि दर्शनासाठी उसळलेला भक्तिसागर!
बाबापुरचा गणेशोत्सव आता केवळ गावाचा उत्सव राहिलेला नाही; तो विदर्भातील लाखो भाविकांच्या श्रद्धेचा सोहळा बनला आहे. पुढील दहा दिवस बाबापुर नगरीत भक्तीचा हा महाप्रवाह असाच सुरू राहणार आहे.
उद्या पुन्हा पाहूया… बाबापुरच्या गणरायाच्या भक्तिसागराचा पुढचा अध्याय!
