वसमत पालिका निवडणुकीत नगराध्यक्ष व नगरसेवकपदासाठी शनिवारी ता. १९ एकूण ७२ मतदान केंद्रावर सकाळी साडेसात ते सायंकाळी साडेपाच यावेळेत मतदान घेतले जाणार असून सुमारे ५९ हजार मतदार मतदानाचा हक्क बजावणार आहेत. वसमत नगर पालिकेच्या नगराध्यक्षपद व १५ प्रभागातील ३० नगरसेवक पदासाठी निवडणुक होत आहे. यासाठी शनिवारी ता. १९ वसमत शहरातील ७२ मतदान केंद्रावर मतदान घेतले जाणार आहे. मतदान प्रक्रियेसाठी प्रशासन सज्ज झाले असून उपविभागीय अधिकारी विकास माने, तहसीलदार शारदा दळवी यांच्या मार्गदर्शनाखाली मतदान प्रक्रियेचे नियोजन करण्यात आले आहे. मतदान प्रक्रियेसाठी ५०० कर्मचाऱ्यांची नियुक्ती करण्यात आली आहे. प्रत्येक मतदान केंद्रावर प्रत्येकी पाच कर्मचारी नियुक्त केले जाणार असून उर्वरीत कर्मचारी राखीव ठेवण्यात आले आहे. वसमत शहरातील संवेदनशील मतदान केंद्रावर वाढीव पोलिस बंदोबस्त ठेवला जाणार आहे. या शिवाय इतर ठिकाणीही पोलिस बंदोबस्त राहणार आहे. तसेच राज्य राखीव दलाचे जवानही बंदोबस्तासाठी तैनात ठेवले जाणार आहे. वसमत शहरातील ७२ मतदान केंद्रावर एकूण ५९८५५ मतदार मतदान करणार असून यामध्ये ३०००२ पुरुष तर २९८५३ महिला मतदारांचा समावेश आहे. एका मतदाराला नगराध्यक्षपदासाठी एक तर दोन नगरसेवक पदासाठी दोन असे तीन मतदान करावे लागणार आहे. मतदान केंद्रावर दिव्यांग मतदारांसाठी स्वतंत्र व्यवस्था असणार आहे. तसेच दिव्यांग, वृध्द तसेच गरोदर महिला मतदारांना रांगेत उभे राहण्याची गरज नाही. त्यांना थेट मतदान करता येणार असल्याचे सुत्रांनी सांगितले.
