ठाणे बाळासाहेबांचं शहर; म्हणूनच वाद टाळले:ठाण्यावर फडणवीसांचा सविस्तर खुलासा; शिवसेनेसाठी भाजपनं नमतं घेतल्याची कबुली

राज्यातील महानगरपालिका निवडणुकांच्या पार्श्वभूमीवर राजकीय समीकरणे वेगाने बदलताना दिसत आहेत. काही शहरांमध्ये मोठ्या पक्षांनी युतीचा मार्ग स्वीकारला आहे, तर काही ठिकाणी प्रत्येक पक्षाने आपली ताकद स्वतंत्रपणे आजमावण्याचा निर्णय घेतला आहे. या सगळ्या पार्श्वभूमीवर ठाणे महानगरपालिकेतील महायुतीच्या जागावाटपावरून सुरू असलेल्या चर्चांना मुख्यमंत्री देवेंद्र फडणवीस यांनी स्पष्ट शब्दांत उत्तर दिले आहे. ठाण्यात भाजपने शिवसेनेसोबत युती करताना काही जागांबाबत नमतं घेतल्याचे त्यांनी उघडपणे मान्य केले असून, त्यामागचे कारणही त्यांनी सविस्तरपणे मांडले आहे. ठाणे भाजपतर्फे बुधवारी गडकरी रंगायतन येथे आयोजित करण्यात आलेल्या ‘आपलं ठाणे, आपला देवाभाऊ’ या विशेष मुलाखतीदरम्यान मुख्यमंत्री फडणवीस यांनी अनेक राजकीय आणि स्थानिक मुद्द्यांवर मोकळेपणाने भाष्य केले. ज्येष्ठ पत्रकार मिलिंद बल्लाळ आणि अभिनेत्री तेजश्री प्रधान यांनी घेतलेल्या या संवादात्मक मुलाखतीत ठाणे महानगरपालिकेतील जागावाटपाचा मुद्दा केंद्रस्थानी होता. मुंबईत भाजपने ज्या पद्धतीने स्वतंत्र लढण्याचा आग्रह धरला, तोच आग्रह ठाण्यात का सोडण्यात आला, असा थेट प्रश्न बल्लाळ यांनी मुख्यमंत्र्यांना विचारला. तसेच भाजपचे 24 नगरसेवक असताना आणि आणखी संख्या वाढण्याची शक्यता असताना युतीचा निर्णय का घेतला, याबाबतही कार्यकर्त्यांमध्ये असलेल्या संभ्रमाचा उल्लेख करण्यात आला. या प्रश्नांना उत्तर देताना मुख्यमंत्री देवेंद्र फडणवीस यांनी प्रामाणिकपणे कबुली दिली की, ठाण्यातील भाजपचे बहुतांश पदाधिकारी आणि कार्यकर्त्यांची इच्छा स्वतंत्रपणे निवडणूक लढवण्याचीच होती. सर्वांनाच वाटत होतं की, आपली ताकद वाढलेली आहे आणि आपण स्वबळावर अधिक नगरसेवक निवडून आणू शकतो, असे त्यांनी स्पष्ट शब्दांत सांगितले. मात्र, त्यांनी याच वेळी हेही अधोरेखित केले की, निर्णय घेताना केवळ आकडेमोड नव्हे तर दीर्घकालीन राजकीय आणि सामाजिक परिणामांचा विचार करणे गरजेचे असते. त्यामुळे केवळ उत्साहाच्या भरात निर्णय न घेता व्यापक दृष्टिकोन ठेवून विचार करण्यात आला, असे त्यांनी सांगितले. फडणवीस यांनी ठाणे महानगरपालिकेची निवडणूक ही केवळ एक निवडणूक नसून ती राजकीय पिढ्या घडवणारी प्रक्रिया असल्याचे स्पष्ट केले. गेल्या दहा वर्षांतील निवडणुकांमधून वेगवेगळ्या पिढ्या राजकारणात सक्रिय झाल्या आहेत. 2017 नंतर एक पिढी तयार झाली, 2022 च्या आसपास दुसरी पिढी उदयास आली आणि आता आणखी नवी पिढी मैदानात उतरली आहे. अशा परिस्थितीत, जर युती करताना सर्वांना संधी मिळाली नाही, तर कार्यकर्त्यांवर अन्याय होण्याची शक्यता असते, याची जाणीव असल्याचे त्यांनी सांगितले. ठाण्यात भाजप मोठा पक्ष असला तरी वर्षानुवर्षे शिवसेना ही शहरात बलशाली राहिली आहे, हे वास्तवही त्यांनी मान्य केले. मुख्यमंत्री फडणवीस यांनी स्पष्ट केले की, भाजपच्या कार्यकर्त्यांना आपली ताकद दाखवण्याची संधी मिळायला हवी, अशी भावना होती आणि त्यासाठी स्वतंत्र लढण्याचा आग्रहही होता. भाजपचे प्रदेशाध्यक्ष रवींद्र चव्हाण यांनीसुद्धा हा मुद्दा ठामपणे मांडला होता. मात्र, सध्याच्या राजकीय परिस्थितीत बाळासाहेब ठाकरे यांची शिवसेना आणि तिचे नेतृत्व एकनाथ शिंदे यांच्याकडे असल्याने, केवळ जागावाटपाच्या कारणावरून वेगळे लढणे योग्य ठरणार नाही, असा निर्णय घेण्यात आला. वेगळे लढलो असतो तर कदाचित सत्ता मिळाली असती, पण त्यातून मनभेद आणि कटुता वाढली असती, असे फडणवीस यांनी स्पष्टपणे सांगितले. ठाणे हे बाळासाहेब ठाकरे यांचे अत्यंत आवडते शहर राहिले आहे, याची आठवण करून देत मुख्यमंत्र्यांनी सांगितले की, अशा शहरात युतीतील पक्षांमध्ये वाद-विवाद आणि संघर्ष निर्माण होणे योग्य नाही. त्यामुळे गरज भासल्यास भाजपने काही जागांबाबत पडती बाजू घेण्याचा निर्णय घेतला. कमी जागा घ्यायच्या, पण एकत्र लढायचं, हा स्पष्ट संदेश आपण दिल्यानंतर पक्षातील सर्वांनी तो स्वीकारला, असे फडणवीस यांनी सांगितले. आज ठाण्यात भाजप आणि शिवसेना एकत्र लढत आहेत आणि हा निर्णय योग्य असल्याचा आपल्याला ठाम विश्वास असल्याचेही त्यांनी नमूद केले. राजकारणापेक्षा शहराचा विकास महत्त्वाचा या मुलाखतीत मुख्यमंत्र्यांनी ठाण्याच्या विकासाशी संबंधित विविध मुद्द्यांवरही भाष्य केले. दळणवळण, कचरा व्यवस्थापन, पाणीपुरवठा, शिक्षण आणि रोजगार या प्रश्नांवर सरकार गंभीरपणे काम करत असल्याचे त्यांनी सांगितले. ठाण्याच्या सर्वांगीण विकासासाठी महापालिका आणि राज्य सरकार यांच्यात समन्वय आवश्यक असल्याचे त्यांनी अधोरेखित केले. राजकारणापेक्षा शहराचा विकास महत्त्वाचा आहे, हा दृष्टिकोन ठेवूनच युती आणि निर्णय घेतले जात असल्याचा पुनरुच्चार त्यांनी केला. राजकीय फायद्यांपेक्षा दीर्घकालीन स्थैर्य आणि विकासाला प्राधान्य शेवटी मुख्यमंत्री देवेंद्र फडणवीस यांनी ठाम शब्दांत सांगितले की, ठाणे असो वा मुंबई, युतीबाबत घेतलेले निर्णय योग्य असून त्याचे सकारात्मक परिणाम दिसून येतील. अल्पकालीन राजकीय फायद्यांपेक्षा दीर्घकालीन स्थैर्य आणि विकासाला प्राधान्य देण्याची ही भूमिका असल्याचे त्यांनी स्पष्ट केले. येणाऱ्या महानगरपालिका निवडणुकांमध्ये ठाण्यातील मतदार या निर्णयावर आपला कौल देतील, असा विश्वासही त्यांनी व्यक्त केला.