276 वा ऑल इंडिया रँक मिळवत असिस्टंट कमांडंटपदी निवड; कुटुंबासह मारेगाव परिसरात अभिमानाचे वातावरण
सुरेश पाचभाई मारेगाव276
मारेगाव : जिद्द, चिकाटी आणि कठोर परिश्रमाच्या जोरावर मारेगावच्या सुपुत्राने राष्ट्रीय स्तरावर यशाचा झेंडा रोवला आहे. मारेगाव येथील हेमंत लता शंकर बुजाडे यांनी UPSCतर्फे घेण्यात आलेल्या CAPF 2025 परीक्षेत तब्बल 276 वा ऑल इंडिया रँक पटकावत असिस्टंट कमांडंट (AC) पदावर दिमाखदार निवड मिळवली आहे. हेमंत यांच्या या उल्लेखनीय यशाने त्यांच्या कुटुंबीयांसह नातेवाईक, मित्रपरिवार आणि संपूर्ण मारेगाव परिसरात आनंदाचे व अभिमानाचे वातावरण निर्माण झाले आहे.
केंद्रीय गृह मंत्रालयाच्या अखत्यारितील केंद्रीय सशस्त्र पोलीस दलात असिस्टंट कमांडंट हे अत्यंत जबाबदारीचे आणि प्रतिष्ठेचे अधिकारी पद आहे. या पदावर निवड झाल्यानंतर BSF, CRPF, CISF, ITBP आणि SSB यापैकी दलांमध्ये अधिकारी म्हणून देशाची अंतर्गत सुरक्षा, सीमा संरक्षण तसेच कायदा व सुव्यवस्था राखण्याची महत्त्वपूर्ण जबाबदारी पार पाडावी लागते.
UPSC-CAPF परीक्षा ही देशातील अत्यंत कठीण आणि प्रतिष्ठेच्या स्पर्धा परीक्षांपैकी एक मानली जाते. लेखी परीक्षा, शारीरिक क्षमता चाचणी, वैद्यकीय तपासणी आणि व्यक्तिमत्त्व चाचणी अशा विविध कठीण टप्प्यांतून उमेदवारांना जावे लागते. या सर्व आव्हानात्मक टप्प्यांवर मात करत हेमंत यांनी ऑल इंडिया स्तरावर 276 वा क्रमांक पटकावत यशाला गवसणी घातली.
हेमंत यांच्या यशामागे सातत्यपूर्ण अभ्यास, कठोर मेहनत, आत्मविश्वास आणि ध्येयाप्रती असलेली अढळ निष्ठा असल्याचे त्यांच्या निकटवर्तीयांकडून सांगण्यात येत आहे. प्रतिकूल परिस्थितीतही प्रयत्नांची पराकाष्ठा करत त्यांनी मिळवलेले हे यश मारेगावातील युवकांसाठी निश्चितच प्रेरणादायी ठरणार आहे.
हेमंत यांच्या निवडीची बातमी समोर येताच नातेवाईक, मित्रपरिवार आणि ग्रामस्थांकडून अभिनंदनाचा वर्षाव सुरू झाला. त्यांच्या यशामुळे कुटुंबीयांचा आनंद गगनात मावेनासा झाला असून, मारेगावच्या शिरपेचात आणखी एक मानाचा तुरा खोवला गेला आहे.
मारेगावच्या युवकांसाठी प्रेरणादायी यश
ग्रामीण भागातून आलेल्या हेमंत बुजाडे यांनी राष्ट्रीय पातळीवरील अत्यंत कठीण परीक्षेत मिळवलेले यश हे ‘ध्येय निश्चित असेल आणि मेहनतीची तयारी असेल, तर यशाला पर्याय नाही’ याचे ज्वलंत उदाहरण ठरले आहे. त्यांच्या या यशामुळे मारेगावच्या शैक्षणिक आणि सामाजिक क्षेत्रातही उत्साहाचे वातावरण निर्माण झाले आहे.
