बातमी ऐका (Marathi Voice Reader)
अंधश्रद्धेचा बाजार मांडणाऱ्या एका भोंदूबाबाला मुंबईतील दिंडोशी पोलिसांनी अटक केली आहे. रिदम पांचाळ असे या भोंदूबाबाचे नाव असून, गेल्या अनेक दिवसांपासून मालाड परिसरात ‘भूत उतरवण्याच्या’ नावाखाली त्याचे अघोरी प्रकार सुरू होते. स्थानिकांनी दिलेल्या तक्रारीनंतर आणि पुराव्यांच्या आधारे पोलिसांनी ही कारवाई केली आहे. रिदम पांचाळ हा गेल्या दोन वर्षांपासून मालाडमध्ये दर गुरुवार आणि रविवारी अघोरी पूजेचे आयोजन करायचा. माझ्या अंगात देवी येते असा दावा करून तो रात्री 6 वाजेपासून दुसऱ्या दिवशी सकाळी 6 वाजेपर्यंत विधी करायचा. सुरुवातीला हे प्रकार त्याच्या घरापुरते मर्यादित होते, मात्र 4 एप्रिल रोजी त्याने चक्क मनपाच्या उद्यानात शेकडो लोकांच्या उपस्थितीत उघडपणे जादूटोण्याचा प्रकार केल्याने संताप व्यक्त केला जात होता. नेमका प्रकार काय? मिळालेल्या माहितीनुसार, मालाड परिसरातील रहिवासी असलेला रिदम पांचाळ गेल्या दोन वर्षांपासून दर गुरुवार आणि रविवारी अघोरी पूजेचे आयोजन करत असे. “माझ्या अंगात देवी संचारते” असा दावा करून तो रात्री 6-7 वाजेपासून दुसऱ्या दिवशी पहाटेपर्यंत विधी करायचा. सुरुवातीला हे प्रकार घरापुरते मर्यादित होते, मात्र 4 एप्रिल रोजी त्याने चक्क मुंबई महानगरपालिकेच्या सार्वजनिक उद्यानात शेकडो लोकांना जमवून उघडपणे जादूटोण्याचे प्रयोग केल्याचे स्थानिकांचे म्हणणे आहे. या घटनेचे व्हिडिओ समाजमाध्यमांवर व्हायरल झाल्यानंतर सर्वत्र संताप व्यक्त केला जात होता. अघोरी साहित्यामुळे दहशतीचे वातावरण हा भोंदूबाबा उपचारांच्या नावाखाली भक्तांकडून अत्यंत संशयास्पद आणि अघोरी साहित्याची मागणी करायचा. यामध्ये बकऱ्याचे काळीज (कलेजा), स्मशानातील राख, लिंबू, टाचण्या, दारूची बाटली आणि सिगारेट यासारख्या गोष्टींचा समावेश होता. हे साहित्य विधीनंतर चार रस्यांच्या मध्यभागी (चौकात) नेऊन ठेवण्यास तो सांगत असे. या कृत्यांमुळे परिसरात भीतीचे वातावरण निर्माण झाले होते. रहिवाशांच्या जागरूकतेमुळे कारवाई वारंवार सांगूनही रिदमने आपले प्रकार थांबवले नाहीत. अखेर दोन आठवड्यांपूर्वी स्थानिक रहिवाशांनी एकत्र येत त्याच्या अघोरी कृत्यांचे व्हिडिओ पोलिसांना दिले आणि सामूहिक स्वाक्षऱ्यांचे निवेदन सादर केले. महाराष्ट्र जादूटोणा विरोधी कायद्यांतर्गत गुन्हा दाखल करण्याची मागणी रहिवाशांनी लावून धरली होती. प्राथमिक चौकशीनंतर दिंडोशी पोलिसांनी आरोपी रिदम पांचाळ याला ताब्यात घेऊन अटक केली आहे.
