मारेगाव तालुक्यातील घटना; ३१ वर्षीय युवकाचा मृत्यू, आत्महत्येचे कारण अद्याप अस्पष्ट
सुरेश पाचभाई मारेगाव
मारेगाव तालुक्यातील शिवनी धोबे येथे ३१ वर्षीय युवकाने राहत्या घरी गळफास घेऊन आत्महत्या केल्याची धक्कादायक घटना रविवारी (दि. २७) रात्री साडेनऊच्या सुमारास उघडकीस आली. या घटनेने परिसरात हळहळ व्यक्त होत असून, युवकाने हे टोकाचे पाऊल नेमक्या कोणत्या कारणातून उचलले, हे अद्याप स्पष्ट झालेले नाही.
अनिकेत पद्माकर धाबेकर (वय ३१) असे मृत युवकाचे नाव आहे. तो शिवनी धोबे, पोस्ट हिवरा (मजरा), ता. मारेगाव येथील रहिवासी होता. अनिकेतच्या नावावर सुमारे तीन एकर शेती असल्याची माहिती असून, तो शेती व्यवसायातून कुटुंबाचा उदरनिर्वाह करत होता.
रविवारी रात्रीच्या सुमारास अनिकेतने राहत्या घरी गळफास घेऊन आत्महत्या केली. ही बाब कुटुंबीयांच्या निदर्शनास आल्यानंतर त्यांनी त्याला तातडीने मारेगाव येथील ग्रामीण रुग्णालयात दाखल केले. मात्र, वैद्यकीय तपासणीनंतर डॉक्टरांनी त्याला मृत घोषित केले.
अनिकेतच्या पश्चात आई-वडील, दोन भाऊ, पत्नी आणि दीड वर्षांचा मुलगा असा परिवार आहे. कुटुंबातील तरुण कर्त्या व्यक्तीच्या अकस्मात निधनाने कुटुंबावर दुःखाचा डोंगर कोसळला असून, शिवनी धोबे गावात हळहळ व्यक्त होत आहे.
दरम्यान, अनिकेतने गळफास घेऊन आत्महत्या करण्यामागील नेमके कारण अद्याप समोर आलेले नाही. या घटनेबाबत पोलिसांकडून तपास सुरू असून, तपासाअंती आत्महत्येचे कारण स्पष्ट होण्याची शक्यता आहे.
ठाणेदार सागर दानडे यांच्या मार्गदर्शनाखाली सहाय्यक पोलीस उपनिरीक्षक दिगंबर किनाके आणि पोलीस कॉन्स्टेबल नरेंद्र तुमराम पुढील तपास करीत आहेत.
