बातमी ऐका (Marathi Voice Reader)
मुंबई येथील विशेष न्यायालयाने मंगळवारी अंमलबजावणी संचालनालयाला (ईडी) ७० कोटी रुपयांच्या मनी लाँड्रिंग (पैशांची बेकायदेशीर उलाढाल) प्रकरणात अशोक खरात याला अटक करण्याची परवानगी दिली. बलात्कार आणि फसवणुकीच्या गुन्ह्यांचा आधीच सामना करत असलेल्या खरातला नाशिक जेलमधून प्रॉडक्शन वॉरंटवर विशेष पीएमएलए न्यायालयासमोर हजर करण्यात आले होते. नाशिक रोड कारागृहातून मंगळवारी सकाळी १० वाजता ईडीच्या अधिकाऱ्यांनी कायदेशीर प्रक्रिया पूर्ण करत अशोक खरात याचा ताबा घेतला. पोलिसांनी पाळली गुप्तता अशोक खरात याने कथितरीत्या अहिल्यानगर जिल्ह्यातील ‘समता नागरी सहकारी पतसंस्थे’मध्ये पीडितांच्या संमतीशिवाय त्यांच्या कागदपत्रांचा वापर करून एकाच दिवसात ६० खाती उघडली होती आणि त्याद्वारे ७० कोटी रुपयांहून अधिकचे व्यवहार केले होते. आता ईडी या सर्व आर्थिक व्यवहारांचा सखोल तपास करणार आहे. यामुळे खरातच्या अडचणी वाढल्या आहेत.
