शहरातील बंद घरे फोडून चोरीचे प्रकार वाढलेले असतानाच आता दुसरीकडे चोरट्यांनी चक्क देवाचेच डोळे पळवल्याची घटना समोर आली आहे. कोकणवाडीतील सिद्धिविनायक गणेश मंदिरात चोरट्याने खिडकीचे गज तोडून आत प्रवेश केला. यामध्ये गणपतीचे चांदीचे डोळे, बाळकृष्णाच्या २ पितळी मूर्ती आणि दानपेटीतील चिल्लर असा ऐवज लंपास केला. या प्रकरणी अज्ञाताविरुद्ध वेदांतनगर ठाण्यात गुन्हा दाखल केला आहे. मंदिर समितीचे अध्यक्ष विजय लक्ष्मण वाघचौरे (५०, रा. कोकणवाडी) यांनी या प्रकरणी फिर्याद दिली आहे. शुक्रवारी (२२ मे) रात्री १० वाजता वाघचौरे मंदिराचे मुख्य चॅनल गेट बंद करून घरी गेले होते. शनिवारी (२३ मे) पहाटे साडेपाच वाजता ते काकड आरतीसाठी आले असता, डाव्या बाजूच्या खिडकीचे गज तुटलेले दिसले. त्यांनी आत पाहिले असता चोरी झाल्याचे उघडकीस आले. पोलिसांकडून परिसरातील सीसीटीव्ही तपासणी सुरू आहे. हा ऐवज केला लंपास
