बातमी ऐका (Marathi Voice Reader)
मुख्यमंत्री माझी लाडकी बहीण योजनेसंदर्भात एक महत्त्वाची माहिती समोर आली आहे. या योजने अंतर्गत ई-केवायसी करू न शकलेल्या महिलांना जिल्ह्याच्या महिला व बाल विकास कार्यालयात कागदपत्रे सादर करण्याचे निर्देश शासनस्तरावरून देण्यात आलेले नाहीत, असे महिला व बालविकास विभागातर्फे स्पष्ट करण्यात आले आहे. महिला व बालविकास विभागातर्फे असे कळवण्यात आले आहे की, मुख्यमंत्री माझी लाडकी बहीण” या योजनेंतर्गत ई-केवायसी करू न शकलेल्या महिलांना जिल्ह्याच्या महिला व बाल विकास कार्यालयात कागदपत्रे सादर करण्याचे निर्देश शासनस्तरावरुन देण्यात आलेले नाहीत. याबाबतचा कोणताही निर्णय शासनाने घेतलेला नाही. तसेच सदर वस्तुस्थिती लक्षात घेता, चुकीच्या बातम्यांवर विश्वास ठेवू नये, असे आवाहन देखील विभागाकडून करण्यात आले आहे. ई-केवायसीची प्रक्रिया सतत चालूच राहणार- एकनाथ शिंदे तर दुसरीकडे उपमुख्यमंत्री एकनाथ शिंदे यांनी अंधेरीत एका कार्यक्रमात बोलताना म्हटले की, लाडक्या बहिणींना मिळणाऱ्या लाभामध्ये बाधा आणणाऱ्या तांत्रिक अडचणी दूर करण्याचे काम केले जात आहे. तसेच प्रत्येक पात्र महिलेपर्यंत लाभ पोहोचवण्यासाठी आम्ही कटिबद्ध आहोत. तसेच ई-केवायसीची प्रक्रिया सतत चालूच राहणार असल्याचे शिंदे यांनी म्हटले आहे. त्यांच्या याच विधानामुळे आता भविष्यात पुन्हा एकदा लाडक्या बहिणींना ई-केवायसी करण्याची संधी मिळण्याची शक्यता आहे, असे म्हटले जात आहे. चुकीच्या पद्धतीने लाभ घेतलेल्यांकडून रक्कम वसूल केली जाणार- अदिती तटकरे मंत्री अदिती तटकरे यांनी देखील एका वृत्तवाहिनीशी बोलताना म्हटले की, पात्र लाभार्थी कोणत्याही योजनेपासून वंचित राहू नयेत यासाठी प्रयत्न केले जात आहे. पण चुकीच्या पद्धतीने लाभ घेतलेल्या लाभार्थ्यांकडून रक्कम वसूल केली जाणार आहे. काही पुरुषांनीही लाडकी बहीण योजनेचा लाभ घेतल्याचे समोर आले आहे. त्यांच्याकडूनही पैसे वसूल करण्यात येणार असल्याचे त्यांनी स्पष्ट केले आहे.
