बातमी ऐका (Marathi Voice Reader)
सेनगाव शहरात सोमवारी रात्री साडेसात वाजता बसस्थानक परिसरात एका महिलेच्या गळ्यातील सोन्याचे मनी मंगळसूत्र अज्ञात चोरट्यांनी हिसकावून नेल्याची धक्कादायक घटना घडली आहे. या प्रकरणी सेनगाव पोलीस ठाण्यात तक्रार दाखल करण्यात आली आहे. मिळालेल्या माहितीनुसार, ज्योती व्यंकटेश खुनेर (वय 30, रा. गंगाखेड) या गेल्या 15 दिवसांपासून त्यांच्या माहेरी सेनगाव येथे आल्या आहे. सोमवारी रात्री 7:30 वाजेच्या सुमारास ज्योती खुनेर आणि त्यांची बहीण सुरेखा पाडळे या दोघी घरातून बसस्थानकाकडे पायी चालत जात होत्या. यावेळी बसस्थानकासमोरून विनानंबरच्या स्प्लेंडर मोटारसायकलवर दोन अनोळखी तरुण आले होते. त्यांनी तोंडाला रुमाल बांधले होते. या चोरट्यांनी त्यांच्या बाजूने दोन वेळा चक्कर मारली. मात्र त्यांनी त्याच्या कडे दुर्लक्ष केले. मात्र तिसऱ्या वेळी चोरट्यांनी त्यांनी संधी साधत ज्योती यांच्या गळ्यातील अंदाजे तीन ग्रॅम वजनाचे सोन्याचे मनी मंगळसूत्र जोरात हिसकावले आणि अंधाराचा फायदा घेऊन दुचाकीवरून पळ काढला. अचानक झालेल्या या प्रकारामुळे दोघीही घाबरून गेल्या. त्यांनी आरडाओरडा केल्यावर आजूबाजूच्या नागरिकांनी चोरट्यांचा पाठलाग करण्याचा प्रयत्न केला, मात्र चोरटे पसार होण्यात यशस्वी झाले. याप्रकरणी ज्योती खुनेर यांनी सेनगाव पोलिस ठाण्यात तक्रार दिली असून, पोलिसांनी अज्ञात चोरट्यांविरुद्ध गुन्हा दाखल करण्याची प्रक्रिया सुरू केली आहे. पोलिस या प्रकरणाचा अधिक तपास करत आहेत. भर रस्त्यात झालेल्या या घटनेमुळे एकच खळबळ उडाली असून पोलिसांनी आता परिसरातील सीसीटीव्ही फुटेज तपासून चोरट्यांची ओळख पटविण्याचा प्रयत्न चालविला आहे. सहाय्यक पोलिस निरीक्षक दीपक मस्के, उपनिरीक्षक रविकिरण खंदारे, जमादार सुभाष चव्हाण, जिवन मस्के यांच्या पथकाने घटनास्थळी भेट देऊन पाहणी केली आहे.
