बातमी ऐका (Marathi Voice Reader)
महाराष्ट्रात मार्चच्या तुलनेत मे महिन्यात पेट्रोल खरेदीत २३ तर डिझेलच्या खरेदीत ५२% वाढ झाली. यामागे साठेबाजीचा संशय व्यक्त करत मुख्यमंत्री देवेंद्र फडणवीस यांनी चौकशीचे आदेश दिले. इंधन बेकायदेशीरपणे व्यावसायिक वापरासाठी वळवले जात आहे का, याचा गृह, पुरवठा विभाग तपास करणार असल्याचे त्यांनी सांगितले. फडणवीस म्हणाले, पंपांवर अतिरिक्त पुरवठा होत आहे. तरीही नियमित किरकोळ वापराचे इंधन साठवून ठेवले जात आहे की, ते अनधिकृत व्यावसायिक वापरासाठी वळवले जात आहे का, हे तपासावे लागेल. अकोल्यात इंधनाचा वापर १५४ तर संभाजीनगर व बीड जिल्ह्यांत ७० टक्क्यांहून जास्त आहे. व्यावसायिक इंधन वापर मात्र थोडा कमी झाला. शेतकऱ्यांना पुरेसे डिझेल पुरवण्याचा प्रयत्न सरकार करत आहे. मात्र, काही लोक या परिस्थितीचा गैरफायदा घेत आहेत. “इंधन साठेबाजीचे संकेत आहेत. आम्ही ते रोखण्याचा प्रयत्न करत आहोत,’ असेही ते म्हणाले. सर्व आकडे मार्च २०२६ ते २३ मे २०२६ । विक्रीचे आकडे सरासरी प्रतिदिन लिटरमध्ये जिल्हा पेट्रोल डिझेल वाढ (%) वाढ (%)
अहिल्यानगर २७% ६६%
अकोला ४४% १५४%
अमरावती २२% ८५%
संभाजीनगर ३५% ६७%
बीड २५% ७५%
बुलढाणा ४७% ६७%
चंद्रपूर २०% ८%
धुळे ७% ६८%
जिल्हा पेट्रोल डिझेल वाढ (%) वाढ (%)
हिंगोली १% ४६%
जळगाव ४४% ८५%
जालना ४९% ५८%
लातूर १६% ५५%
मुंबई शहर ११% १६%
मुंबई उपनगर १३% २३%
नागपूर १६% १९%
नांदेड २९% ११४%
जिल्हा पेट्रोल डिझेल वाढ (%) वाढ (%)
नंदुरबार ३०% ४१%
नाशिक २६% ७०%
धाराशिव १९% ८७%
परभणी २४% ७०%
पुणे ३१% ३७%
सोलापूर २५% ५१%
वर्धा ५३% २७%
वाशिम ४३% १०५%
व्यावसायिक वापर घटल्याने संशय सूत्रांनी सांगितले की, किरकोळ डिझेलची मागणी ५२ टक्क्यांनी वाढली असताना व्यावसायिक इंधनाचा वापर मात्र घटला. याची आकडेवारी समोर आल्यानंतर मुुख्यमंत्र्यांचा साठेबाजीचा संशय वाढला. (महाराष्ट्र राज्यात मार्च २०२६ पर्यंत सरासरी प्रतिदिन १, ७३,३७,००० लिटर पेट्रोल, ३,२२,५२,००० लिटर डिझेलची विक्री होत होती. २३ मे २०२६ पर्यंत पेट्रोल विक्रीत ३९,७५, ००० तर डिझेल विक्रीत १,६६,७६००० एवढी वाढ झाली. पेट्रोल विक्री २३ तर डिझेल विक्री ५२ टक्क्यांनी वाढली.) स्रोत : पुरवठा विभाग शालेय बस भाडेवाढीच्या हालचाली विद्यार्थ्यांची वाहतूक करण्यासाठी काही शाळा स्वत:ची बससेवा चालवतात. त्यासाठी ते पालकांकडून वेगळे भाडे वसूल करतात. त्यापैकी बहुतांश शाळांनी बस भाडेवाढीच्या हालचाली सुरू केल्या आहेत. काही घाऊक खरेदीदार बचतीसाठी पंपांकडे वळल्याने मागणी वाढली महाराष्ट्र पेट्रोल डीलर असोसिएशनचे अध्यक्ष अमित गुप्ता म्हणाले की, ऑइल कंपनीच्या डेपोतून टँकरने १५,००० लिटर किंवा त्यापेक्षा अधिक डिझेल खरेदी करणाऱ्यांना घाऊक ग्राहक मानले जाते. यामध्ये एसटी महामंडळ, रेल्वे, खाजगी वीज निर्मिती प्लँट्स, मोठे कारखाने येतात. घाऊक खरेदीचे दर सामान्य नागरिकांना मिळणाऱ्या इंधनापेक्षा वाढले आहेत. त्यामुळे खर्च टाळण्यासाठी घाऊक खरेदीदार पंपाकडे वळल्याने मागणी वाढली, अशी शक्यता आहे. पुढे काय? गृह विभाग आणि पुरवठा विभागाची संयुक्त पथके पेट्रोल पंपांचे ऑडिट करणार; साठेबाजांवर गुन्हे दाखल होणार आणि दोषी पंपांचे परवाने रद्द होऊ शकतात.
