बातमी ऐका (Marathi Voice Reader)
घातक शस्त्रांचा वापर करून जीवे मारण्याचा प्रयत्न केल्याच्या गुन्ह्यातील मुख्य आरोपी आणि सराईत गुन्हेगार सुभाष कोंडीबा चौधरी (रा. चौधरी मळा, काष्टी, ता. श्रीगोंदे) याला अखेर श्रीगोंदे पोलिसांनी शिताफीने अटक केली आहे. गेल्या तीन महिन्यांपासून तो पोलिसांना गुंगारा देत फरार होता. श्रीगोंदे पोलीस ठाण्यात २८ फेब्रुवारी २०२६ रोजी दाखल झालेल्या एका गंभीर गुन्ह्यापासून सुभाष चौधरी अटक टाळण्यासाठी सतत ठिकाणे बदलत होता. त्याच्यावर विविध पोलीस ठाण्यांत गंभीर स्वरूपाचे गुन्हे दाखल आहेत. पोलीस निरीक्षक किरण शिंदे यांच्या मार्गदर्शनाखाली पोलिसांनी विशेष पथक नेमून त्याचा शोध सुरू केला होता. या पथकाने श्रीगोंदे, काष्टी, दौंड, यवत, बारामती, पाटस, पुणे आणि कोल्हापूर परिसरात गोपनीय माहितीच्या आधारे अनेकदा शोधमोहीम राबवली; मात्र तो सतत पोलिसांना गुंगारा देत होता. दरम्यान, पोलिस अधीक्षक मुम्मका सुदर्शन व अपर पोलीस अधीक्षक वैभव कलुबर्मे यांच्या सूचनेनुसार तपास सुरू असताना, पोलिसांना आरोपीच्या ठावठिकाणाची माहिती मिळाली. सापळा रचून पळून जाण्याच्या तयारीत असलेल्या चौधरीला पोलिसांनी बेड्या ठोकल्या. या कारवाईत उपनिरीक्षक संजय वाघमारे, संदीप राऊत, वैजीनाथ कुटे, रवींद्र पाचारणे व बबन साळवे यांनी सहभाग घेतला.
