बातमी ऐका (Marathi Voice Reader)
जगन्नाथ पुरीच्या धर्तीवर भगवान जगन्नाथ यात्रेस सोलापुरात सुरूवात झाली आहे. पहिल्या दिवशी देवाला जलाभिषेक केला जातो. जलाभिषेकामुळे भगवंत पंधरा दिवस आजारी पडतात अशी भाविकांची श्रद्धा आहे. त्यामुळे देवाच्या डोक्याला शाल बांधण्यात येते. दूध, हळद, दालचिनी, वनऔषधीपासून काढा दिला जातो. डाळ खिचडीचा प्रसाद देण्याची प्रथा आहे. त्याच पध्दतीने सोलापुरातील जुना कुंभारी नाका येथील इस्कॉन मंदिरात रविवारी सकाळी भगवान जगन्नाथ यांच्या मूर्तीला जलस्नान करण्यात आले. भजन सोहळा, प्रवचन सोहळा पार पडला. शेकडो साधकांची उपस्थिती होती. हरे रामा, हरे कृष्णा भजन गात भाविकांना आनंद देऊन गेला. मंगलदायी व चैतन्यदायी सोहळा होता. राधा- दामोदर यांच्या मूर्तीला विशेष शृंगार अलंकार पूजा करण्यात आली होती. सकाळी सात पासून भाविकांची मांदियाळी जमत होती. भजन सोहळ्यात वातावरण अतिशय वैभवशाली झाले होते. स्नान अभिषेक झाल्यानंतर भगवंताला सर्दी व ताप येत असल्याच्या भावनेतून आजपासून पंधरा दिवस त्याला शाल व कानटोपी बांधतात. दररोज वनौषधी काढा देण्याची आगळी-वेगळी परंपरा आहे. विश्रांतीनगर देवाची महापूजा करून मंगळवार ता. २२ जुलै रोजी हुतात्मा स्मृती मंदिरापासून जगन्नाथ रथोत्सव साजरा केला जातो. भगवान जगन्नाथ यांच्यासाठी शाल व कानटोपी विणण्याची प्रथा आहे. वृंदावन- मथूरेतून सूत (दोरा) आणून भाविक त्या दोरीपासून टोपी व शाल विणतात. आज सकाळी आठ ते दहा वेळेत चंदन व सुंगधी द्रव्य वापरून देवाचा स्नान अभिषेक सोहळा पार पडला. आजचे महत्व विषद करणारे प्रवचन गोविंद भक्त दास (अमेरिका) यांचे झाले. यानंतर ५६ भोग महाप्रसाद झाला. भाविकांसाठी “दहिचिडा’ हा विशेष प्रसाद होता. पोहे, दही, केळी, आमरस घालून हा प्रसाद केला जातो. मंदिराचे अध्यक्ष कृष्णभक्तदास, पावन हरिनाम दास यांच्यासह भाविकांनी सोहळ्याचे आयोजन केले होते.
