बातमी ऐका (Marathi Voice Reader)
शेतकरी कर्जमाफीतील जाचक अटी रद्द करून सरसकट कर्जमाफी मिळावी, या प्रमुख मागणीसाठी राष्ट्रवादी काँग्रेस शरद पवार पक्षाचे आमदार रोहित पवार यांनी पंढरपूरमध्ये गेल्या दोन दिवसांपासून ‘अन्नत्याग आंदोलन’ सुरू केले आहे. त्यांच्या या आंदोलनाला विविध शेतकरी संघटना आणि विरोधी पक्षनेत्यांचा वाढता पाठिंबा मिळत असला तरी, सत्ताधारी नेत्यांकडून मात्र यावर जोरदार टीका केली जात आहे. आमदार सदाभाऊ खोत आणि गोपीचंद पडळकर यांच्यापाठोपाठ आता भाजप आमदार परिणय फुके यांनीही रोहित पवारांच्या या उपोषणावर सडकून टीका केली असून, हे आंदोलन म्हणजे निव्वळ ‘जरांगे पाटील स्टाईल नौटंकी’ असल्याचा घणाघात त्यांनी केला आहे. शेतकरी कर्जमाफीतील जाचक अटी रद्द करण्याच्या मागणीसाठी आमदार रोहित पवार यांनी सुरू केलेले ‘अन्नत्याग आंदोलन’ ही निव्वळ ‘मनोज जरांगे पाटील स्टाईल नौटंकी’ असल्याची खोचक टीका भाजपचे विधानपरिषद आमदार डॉ. परिणय फुके यांनी केली आहे. एकीकडे सत्ताधारी नेत्यांकडून या उपोषणाची खिल्ली उडवली जात असतानाच, दुसरीकडे मात्र प्रत्यक्ष मनोज जरांगे पाटील यांनी रोहित पवारांच्या या आंदोलनाला आपला जाहीर पाठिंबा दर्शवला आहे, ही बाब या राजकीय घडामोडींमध्ये विशेष लक्षवेधी ठरत आहे. काय म्हणाले परिणय फुके? रोहित पवारांच्या आंदोलनावर टीका करताना परिणय फुके म्हणाले, रोहित पवार जे उपोषणाला बसले आहेत, ते शेतकऱ्यांच्या भल्यासाठी किंवा त्यांच्या कोणत्याही खऱ्या प्रश्नांसाठी नाही. त्यांनी जे ‘अन्नत्याग आंदोलन’ सुरू केले आहे, त्याऐवजी त्यांनी आता ‘मीडिया त्याग आंदोलन’ करायला हवे, असा खोचक टोला त्यांनी लगावला आहे. उद्धव ठाकरेंच्या बैठकीवर निशाणा शिवसेना ठाकरे गटाचे काही खासदार उपमुख्यमंत्री एकनाथ शिंदे यांच्या संपर्कात असून ते लवकरच शिंदे गटात प्रवेश करणार असल्याच्या जोरदार चर्चा सध्या राजकीय वर्तुळात सुरू आहेत. याच पार्श्वभूमीवर उद्धव ठाकरे यांनी आपल्या खासदारांची तातडीची बैठक बोलावली असून, यावरून भाजप आमदार डॉ. परिणय फुके यांनी त्यांच्यावर जोरदार निशाणा साधला आहे. ज्याप्रमाणे पूर्वी आमदारांनी उठाव केला, तसाच उठाव आता खासदारही करतील या भीतीपोटीच उद्धव ठाकरे आपल्या खासदारांची मोजदाद आणि चाचपणी करत आहेत, असे फुके यांनी म्हटले आहे.
