शिवसेना (उद्धव बाळासाहेब ठाकरे) गटातील सहा खासदारांच्या राजकीय भूमिकेमुळे राज्यातील राजकारण तापलेले असतानाच महाराष्ट्र सरकारच्या गृह विभागाने या सर्व खासदारांना Y+ दर्जाची सुरक्षा देण्याचा निर्णय घेतला आहे. त्यामुळे ‘ऑपरेशन टायगर’ प्रकरणात आणखी एक महत्त्वाची घडामोड समोर आली आहे. मिळालेल्या माहितीनुसार, ठाकरे गटातून वेगळी भूमिका घेतलेल्या सहा खासदारांच्या सुरक्षेचा आढावा घेतल्यानंतर गृह विभागाने त्यांना Y+ सुरक्षा देण्याचे आदेश जारी केले आहेत. या निर्णयानंतर राजकीय वर्तुळात विविध चर्चांना उधाण आले आहे. हे आहेत बंडखोर खासदार… 1. संजय जाधव 2. संजय देशमुख 3. नागेश पाटील आष्टीकर 4. ओमराजे निंबाळकर 5. भाऊसाहेब वाकचौरे 6. संजय दिना पाटील संजय राऊतांच्या वक्तव्यानंतर निर्णयाची चर्चा विशेष म्हणजे, काही वेळापूर्वीच खासदार संजय राऊत यांनी पत्रकार परिषदेत म्हटले होते की, आमच्या पक्षाचे खासदार-आमदार तोडणार असे म्हणणाऱ्या लोकांना वाटते एकदा पक्षाचे दोन तुकडे केले आता पुन्हा करू. त्यांना मी सांगतो आता जर पक्ष फोडला तर तुम्हाला तोडू नाहीतर बाळासाहेब ठाकरेंचे कार्यकर्ते म्हणून घेणार नाही. तुम्ही यंत्रणेची धमकी कोणाला देत आहात? आम्ही कारागृहात जाऊन आलो आहोत, पु्न्हा जाण्यासाठी तयार आहे. पण तुम्हाला धडा शिकवून जेलमध्ये जाईल. आमचाच पक्ष मुळ शिवसेना आहे, शिंदेंचा गट आहे. जे दावा करतात आमचे खासदार फुटले त्यांनी ते सिद्ध केले पाहिजे. संजय राऊत म्हणाले की, उद्धव ठाकरे मेहनत घेतात उमेदवार निवडून आणतात आणि तुम्ही त्यांना फोडतात ही कसली लोकशाही आहे? पंतप्रधान नरेंद्र मोदी बाहेर देशात जाऊन भाषणं करतात, त्यांनी देशात काय सुरू आहे, याकडे लक्ष दिले पाहिजे. आज बैठकीला आम्ही खासदारांची वाट बघू नाहीतर कारवाईला सुरूवात करणार. जे खासदार फुटतील त्यांनी सुटी देणार नाही. बेईमानी करणाऱ्या लोकांना आता सोडणार नाही, त्यांच्या मतदारसंघात आम्ही सभा घेणार आहोत यासाठी आमच्यासोबत शरद पवार आणि काँग्रेससुद्धा असणार आहेत. कोणी खासदार फुटला तर त्यांना आम्ही धडा शिकवू! येथे वाचा संपूर्ण बातमी राऊत म्हणाले होते, “आता एकनाथ शिंदे त्यांना बॉडीगार्ड देतील, मागे-पुढे गाड्या देतील आणि जणू काही युद्ध जिंकून आल्यासारखे ते फिरतील.” राऊत यांच्या या वक्तव्यानंतर काही तासांतच सहा खासदारांना Y+ सुरक्षा मंजूर झाल्याची माहिती समोर आल्याने राजकीय चर्चांना अधिक वेग आला आहे. Y+ सुरक्षेत काय असते? Y+ सुरक्षा श्रेणीत साधारणपणे सशस्त्र सुरक्षा कर्मचारी, वैयक्तिक सुरक्षा अधिकारी (PSO) आणि 24 तास सुरक्षा व्यवस्था दिली जाते. संबंधित व्यक्तीच्या धोक्याच्या आकलनानुसार सुरक्षा यंत्रणा तैनात केली जाते. ठाकरे गटाकडून ‘दबावाचे राजकारण’ असल्याचा आरोप गेल्या काही दिवसांपासून ठाकरे गटाकडून या खासदारांवर दबाव, प्रलोभने आणि विविध आश्वासने देऊन भूमिका बदलण्यास भाग पाडल्याचे आरोप केले जात आहेत. पवनराजे निंबाळकर हत्याकांडातील खटल्यापासून ते इतर राजकीय मुद्द्यांपर्यंत अनेक दावे ठाकरे गटातील नेत्यांनी केले आहेत. याच पार्श्वभूमीवर सुरक्षा वाढवण्याचा निर्णय झाल्याने विरोधकांकडून प्रश्न उपस्थित होण्याची शक्यता आहे. शिंदे गटाचा दावा – ‘जनतेच्या सुरक्षेसाठी निर्णय’ दुसरीकडे, शिंदे गटातील नेत्यांचा दावा आहे की, या खासदारांना जनतेच्या भावना आणि संभाव्य आंदोलनांच्या पार्श्वभूमीवर सुरक्षा देण्यात आली आहे. काही नेत्यांनी यापूर्वीच या खासदारांना मतदारसंघात विरोधाचा सामना करावा लागू शकतो, अशी शक्यता व्यक्त केली होती. राजकीय संघर्ष आणखी तीव्र होण्याची चिन्हे सहा खासदारांना Y+ सुरक्षा मिळाल्यानंतर आता ठाकरे गटाकडून यावर काय प्रतिक्रिया येते, याकडे लक्ष लागले आहे. आधीच कारणे दाखवा नोटिसा, लोकसभा अध्यक्षांकडे तक्रार, अपात्रतेची शक्यता आणि स्वतंत्र गटाच्या मान्यतेचा प्रश्न प्रलंबित असताना सुरक्षेच्या मुद्द्याने या संघर्षात आणखी एक नवा अध्याय जोडला आहे.
