बातमी ऐका (Marathi Voice Reader)
राज्यात टीईटी परिक्षेचा पेपर फुटी प्रकरणात शिक्षण मंत्री दादा भुसे यांनी राजिनामा द्यावा अशी मागणीकरीत ठाकरे गटाच्या पदाधिकाऱ्यांनी सोमवारी ता. २९ जवळा बाजार (ता.औंढा) येथे भुसे यांच्या छायाचित्राला जोडे मारो आंदोलन केले. यावेळी शासनाच्या विरोधात प्रचंड घोषणाबाजी करण्यात आली. राज्यात नुकत्याच झालेल्या टीईटी परीक्षेच्या पेपरफुटी प्रकरणामुळे प्रामाणिकपणे अभ्यास करून परीक्षा देणाऱ्या गुरुजींमध्ये तिव्र नाराजी व्यक्त होत आहे. केंद्राच्या दुर्लक्षामुळे नीटचा पेपर फुटला तर राज्याच्या दुर्लक्षाने टीईटीचा पेपर फुटला आहे.या दोन्ही प्रकरणाला सरकारच जबाबदार असल्याचा आरोप केला जात आहे. टीईटी पेपर फुटीच्या पार्श्वभूमीवर हिंगोली जिल्ह्यातील औंढा नागनाथ तालुक्यातील जवळा बाजार येथे ठाकरे गटाच्या पदाधिकाऱ्यांनी शिक्षणमंत्री दादा भुसे यांच्या छायाचित्राला जोडेमारो आंदोलन केले. यावेळी ठाकरे गटाचे जिल्हा प्रमुख संदेश देशमुख, माजी जिल्हा परिषद सदस्य माऊली झटे, दत्तराव अंभोरे, सुरेश सवंडकर, सखाराम कदम, मुंजाजी पावडे, आकाश अंभोरे, एन. डी. नागरे, मुंजाअप्पा ढोबळे, भगवानराव ढोबळे, एकनाथ कदम यांच्यासह पदाधिकारी व कार्यकर्त्यांची मोठ्या संख्येने उपस्थिती होती. यावेळी जिल्हा प्रमुख देशमुख तसेच माऊली झटे यांनी मार्गदर्शन केले. शासनाच्या निष्काळजीपणामुळेच पेपर फुटीची प्रकरणे होत असल्याचा आरोप करण्यात आला आहे. या पेपरफुटी प्रकरणाची जबाबदारी स्विकारून शिक्षणमंत्री भुसे यांनी राजिनामा द्यावा अशी मागणी करून कार्यकर्त्यांनी प्रचंड घोषणाबाजी करण्यात आली. या आंदोलनाला हिंसक वळण लागू नये यासाठी औंढा पोलिसांनी चोख बंदोबस्त ठेवला होता. यावेळी आंदोलनकर्त्यांनी पोलिस प्रशासनाकडे निवेदन सादर केले तसेच तहसील प्रशासनामार्फत शासनाकडे निवेदन सादर केले.
