बातमी ऐका (Marathi Voice Reader)
पुणे: पुणेकरांनो पुढील काही तास घराबाहेर पडताना काळजी घ्या. विकेंड असल्यानं बाहेर फिरण्याचा तुमचा प्लॅन असेल तर त्याआधी वरूणराजाचा प्लॅन नक्की तपासा. हवामान विभागाने (IMD) पुण्यासाठी पुढील तीन दिवसांचा अत्यंत महत्त्वाचा इशारा दिला आहे. यामध्ये आज (२६ जुलै) पुण्यात काही ठिकाणी मुसळधार पाऊस पडण्याची तीव्र शक्यता वर्तवली आहे. पावसाचा हा जोर पुढील दोन दिवस कायम राहणार आहे.
आज दुपार आणि संध्याकाळनंतर आकाश पूर्णपणे ढगाळ होऊन जोरदार पावसाला सुरुवात होईल. सकाळपासूनही पावसाची भुरभूर मध्ये मध्ये सुरूच राहील. तर, आकाश मुख्यतः ढगाळ राहील. या पावसामुळे तापमानतही घट होणार असून पुणेकरांना गारवा अनुभवायला मिळेल. पुण्यात काही ठिकाणी मध्यम ते मुसळधार पावसाची शक्यता आहे. तर घाटमाथ्यावर अत्यंत मुसळधार पाऊस कोसळण्याचा इशारा देण्यात आला असून रेड अलर्ट जारी करण्यात आला आहे. .
सोमवारीही दुपारनंतर शहरात हलका ते मध्यम पाऊस राहील. तर, पुण्यातील घाट परिसरामध्ये काही ठिकाणी मुसळधार ते अतिमुसळधार पाऊस कोसळण्याची शक्यता कायम आहे. त्यामुळे पर्यटकांनी घाट रस्ते आणि धरणांच्या परिसरात जाणे टाळावे, असं आवाहन करण्यात आलं आहे. पावसाचा हा जोर पुढील 3-4 दिवस कायम राहणार असल्याचा अंदाज आहे.
मंगळवारी म्हणजेच 28 जुलै रोजीही शहरात ढगाळ वातावरण राहून हलक्या सरी कोसळतील. घाट परिसरात काही ठिकाणी मुसळधार ऊस पडण्याची शक्यता कायम राहील. तर, कमाल तापमान २९°C आणि किमान २३°C च्या आसपास असेल.
पुण्यातील सखल भागात राहणाऱ्या नागरिकांनी आणि प्रामुख्याने घाट परिसरात प्रवास करणाऱ्या वाहनचालकांनी हवामानाचा अंदाज घेऊनच बाहेर पडावे. नदी-नाले आणि पाणी साचणाऱ्या ठिकाणांपासून दूर राहण्याचे आवाहन करण्यात आले आहे.
