बातमी ऐका (Marathi Voice Reader)
नाशिक: “अभिनंदन! तुम्ही एक नवा विश्वविक्रम प्रस्थापित केला आहे!” गिनीज वर्ल्ड रेकॉर्ड्सचे प्रतिनिधी ऋषिकेश नाग यांनी ही अधिकृत घोषणा करताच रविवारी गोदावरीचा पवित्र तीर ‘भारत माता की जय’च्या जयघोषाने दुमदुमून गेला. अमेरिकेचा एकाच वेळी ३०३ शंखवादकांचा असलेला जुना विक्रम मागे टाकून नाशिकमध्ये तब्बल ५१७ व्यक्तींनी एकाच वेळी सामूहिक शंखनाद करत गिनीज बुक ऑफ वर्ल्ड रेकॉर्ड्समध्ये आपल्या नावाची ऐतिहासिक नोंद केली आहे.
कोजागरी पौर्णिमेच्या पावन पर्वावर नाशिकच्या गोदाकाठावरील ऐतिहासिक यशवंत महाराज पटांगणात अनंत विजय शंखनाद पथक आणि सिंहस्थ कुंभमेळा प्राधिकरण यांच्या संयुक्त विद्यमाने या भव्य उपक्रमाचे आयोजन करण्यात आले होते. राज्याचे जलसंपदा मंत्री तथा जिल्ह्याचे पालकमंत्री गिरीश महाजन यांच्या प्रमुख उपस्थितीत ५१७ शंखवादकांनी एकाच वेळी फुंकलेल्या शंखध्वनीने संपूर्ण परिसरात चैतन्य निर्माण केले.
दिवाळीचा फराळ घरातून थेट सातासमुद्रपार जाणार! टपाल विभाग सज्ज, नेमकी योजना काय? Video
कठोर निकष आणि निरीक्षकांच्या उपस्थितीत विक्रम सिद्ध
गिनीज वर्ल्ड रेकॉर्ड्सचे प्रतिनिधी ऋषिकेश नाग यांनी विश्वविक्रमाच्या पडताळणी प्रक्रियेची माहिती दिली. ते म्हणाले, "शंख वाजवणे ही केवळ धार्मिक कृती नसून त्यासाठी श्वसनावर नियंत्रण, नियमित सराव, प्राणायाम आणि उत्तम शारीरिक क्षमतेची आवश्यकता असते. मोठ्या संख्येने सहभागींचा ताळमेळ साधून सामूहिक शंखनाद करणे अत्यंत आव्हानात्मक होते."
अमेरिकेचा ३०३ जणांचा पूर्वीचा विक्रम मोडण्यासाठी या कार्यक्रमात ५०० हून अधिक जणांनी नावनोंदणी केली होती. दोन विशेष निरीक्षकांनी सहभागींच्या नोंदी, प्रत्यक्ष सहभाग आणि निर्धारित वेळेची अचूक पडताळणी केली. सर्व निकष पूर्ण झाल्यानंतर ५१७ जणांचा हा नवीन जागतिक विक्रम अधिकृतपणे घोषित करण्यात आला.
भारतीय संस्कृती आणि सामूहिक शक्तीचे दर्शन
विक्रम प्रस्थापित झाल्यानंतर पालकमंत्री गिरीश महाजन यांनी सर्व ५१७ शंखवादकांचे कौतुक करत मनःपूर्वक अभिनंदन केले. हा उपक्रम देशाच्या लौकिकात भर घालणारा ठरला असून भारतीय संस्कृती, आध्यात्मिक परंपरा आणि नाशिककरांच्या अफाट शिस्तीचे व एकजुटीचे दर्शन या विश्वविक्रमाच्या माध्यमातून जगाला झाले असल्याचे त्यांनी नमूद केले.
