विशाल किन्हेकार यांच्या वाढदिवसानिमित्त आयोजन; गरजू रुग्णांनी लाभ घेण्याचे आवाहन
मारेगाव | सुरेश पाचभाई
मारेगाव : सर्वसामान्य नागरिकांना आरोग्यसेवा उपलब्ध व्हावी आणि गरजू रुग्णांना आजारांचे निदान व उपचाराची संधी मिळावी, या उद्देशाने शिवसेना (शिंदे गट) मारेगाव तालुकाप्रमुख विशाल किन्हेकार यांच्या वाढदिवसानिमित्त उद्या, मंगळवार, दि. २७ ऑक्टोबर रोजी मारेगाव येथे मोफत सर्वरोग निदान, शस्त्रक्रिया व उपचार शिबिराचे आयोजन करण्यात आले आहे.नगरपंचायत कार्यालयाजवळील हनुमान मंदिराच्या प्रांगणात सकाळी १० ते दुपारी २ वाजेपर्यंत हे शिबिर होणार आहे. या शिबिरात विविध आजारांसाठी तज्ज्ञ डॉक्टरांकडून तपासणी व वैद्यकीय मार्गदर्शन उपलब्ध करून दिले जाणार आहे.
रक्तदाब, मधुमेहापासून हृदयरोगापर्यंत तपासणी
शिबिरात रक्तदाब, मधुमेह, डोळ्यांचे विकार, मोतीबिंदू, हर्निया, मूळव्याध, स्त्रीरोग, हाडांचे विकार, सांधेदुखी, हृदयरोग, बालरोग, कान-नाक-घसा, दंतविकार, दमा तसेच त्वचाविकारांसह विविध आजारांची तपासणी व उपचार केले जाणार आहेत. आवश्यकतेनुसार शस्त्रक्रियेसंदर्भातही मार्गदर्शन करण्यात येणार आहे.
आधारकार्ड, रेशनकार्डची प्रत आणणे आवश्यक
शिबिराचा लाभ घेण्यासाठी येणाऱ्या नागरिकांनी आधारकार्ड आणि रेशनकार्डची छायांकित प्रत सोबत आणावी, असे आयोजकांकडून सांगण्यात आले आहे. शिबिरासंदर्भातील अधिक माहितीसाठी संजय आवारी, धनराज भट, शुभम ठावरी, शंकर नागोसे किंवा प्रशांत भंडारी यांच्याशी संपर्क साधता येईल.
तालुक्यातील गरजू नागरिकांनी या मोफत आरोग्य शिबिरात सहभागी होऊन उपलब्ध वैद्यकीय सुविधांचा लाभ घ्यावा, असे आवाहन शिवसेना शाखा, मारेगावच्या वतीने करण्यात आले आहे.
