बातमी ऐका (Marathi Voice Reader)
छत्रपती संभाजीनगर: बाप-लेकीचं नातं प्रेम आणि विश्वासाचं असतं. पण छत्रपती संभाजीनगरच्या मिसारवाडी भागातून एक भयंकर प्रकार पुढे आला आहे. एका बापानंच पोटच्या मुलीचा अमानुष छळ केला. अंगावर थंड पाणी टाकून तिच्या हातापायांना सिगारेटचे चटके दिले. त्यानंतर तिच्या डोक्याच्या मागील बाजूचे केस कापून तिच्यासोबत गैरवर्तन करण्याचा प्रयत्न केला. या प्रकरणी मुलीच्या 24 वर्षीय भावाने सिडको पोलिसांत धाव घेतली. आरोपीला अटक करण्यात आली असून त्याची रवानगी न्यायालयीन कोठडीत केली आहे.
पोलिसांत दिलेल्या तक्रारीनुसार, फिर्यादी हा आपल्या पत्नीसोबत राहतो आणि पेंटरचे काम करून कुटुंबाचा उदरनिर्वाह करतो. त्याचे लहान भाऊ आणि दहा वर्षीय बहीण वडिलांसोबत राहतात. 25 ऑक्टोबर रोजी सकाळी 11.16 वाजण्याच्या सुमारास फिर्यादीच्या काकांनी त्याला फोन केला. पीडित मुलगी आणि तिचे वडील घरी दिसत नसल्याचे त्यांनी सांगितले. त्यानंतर फिर्यादीने वडिलांच्या घरी जाऊन पाहणी केली; मात्र दोघेही तेथे आढळले नाहीत. त्यामुळे त्याने त्यांचा शोध सुरू केला.
तू बहिणीशी का बोललास? तरुणाला रात्रीच अडवलं, लोखंडी रॉड आणि कटरने…, छ. संभाजीनगरात खळबळ
जहागीर कॉलनी, जटवाडा रोड परिसरात राहणाऱ्या त्याच्या मावस बहिणीचा फोन आला. पीडित मुलगी तिच्याकडे आल्याचे तिने सांगितले. त्यानुसार फिर्यादी तेथे पोहोचला. भावाला पाहताच मुलगी रडू लागली. त्याने तिची विचारपूस केली असता, तिने स्वतःसोबत घडलेला प्रकार सांगितला.
पीडितेने दिलेल्या माहितीनुसार, 25 ऑक्टोबर रोजी पहाटे दोन ते तीन वाजण्याच्या सुमारास वडिलांनी तिच्या अंगावरील कपडे जबरदस्तीने काढले. त्यानंतर तिच्या अंगावर थंड पाणी ओतून हातापायांना सिगारेटचे चटके दिले. तसेच तिच्या डोक्याच्या मागील बाजूचे केस कापून तिचा विनयभंग केल्याचा आरोप तक्रारीत करण्यात आला आहे.
बहिणीने सांगितलेला प्रकार ऐकल्यानंतर फिर्यादीने सिडको पोलिस ठाणे गाठून तक्रार दाखल केली. त्यानुसार पोलिसांनी आरोपी वडिलांविरोधात गुन्हा नोंदवून त्याला अटक केली. आरोपीला न्यायालयात हजर केले असता, त्याची न्यायालयीन कोठडीत रवानगी करण्यात आली. या प्रकरणाचा पुढील तपास पोलिस उपनिरीक्षक सोपान नरळे करीत आहेत.
