मारेगाव तालुक्यातील कोसारा(सोईट )येथे पोलीस व महसूल प्रशासन सतर्क; नागरिकांना पुलावरून प्रवास टाळण्याचे आवाहन
सुरेश पाचभाई मारेगाव
मारेगाव, दि. ३१ जुलै : सतत सुरू असलेल्या मुसळधार पावसामुळे मारेगाव तालुक्यातील कोसारा येथील (सोईट)नदीला पूर आला असून पुलावर १ ते २ फूट पाणी वाहत आहे. त्यामुळे यवतमाळ व चंद्रपूर जिल्ह्यांना जोडणारा महत्त्वाचा मार्ग तात्पुरता बंद झाला असून दोन्ही जिल्ह्यांतील संपर्क खंडित झाला आहे.
पूरस्थिती लक्षात घेता मारेगाव पोलीस प्रशासन आणि महसूल विभागाने तातडीने घटनास्थळी धाव घेतली आहे. आज शुक्रवार, दि. ३१ जुलै २०२६ रोजी सकाळी ७ वाजल्यापासून पोलीस निरीक्षक सागर दानडे, पोलीस उपनिरीक्षक रवी बोरकुले, पोलीस कर्मचारी सागर दिपवार, प्रवीण वंजारी तसेच तहसील प्रशासनाचे कर्मचारी घटनास्थळी उपस्थित राहून परिस्थितीवर लक्ष ठेवत आहेत.
पुलावरून पाण्याचा वेगाने प्रवाह सुरू असल्याने कोणतीही दुर्घटना घडू नये यासाठी वाहतूक रोखण्यात आली आहे. नागरिकांनी जीव धोक्यात घालून पुल ओलांडण्याचा प्रयत्न करू नये तसेच प्रशासनाच्या सूचनांचे काटेकोर पालन करावे, असे आवाहन करण्यात आले आहे.
दरम्यान, पावसाचा जोर कायम राहिल्यास नदीच्या पाणीपातळीत आणखी वाढ होण्याची शक्यता असून प्रशासन परिस्थितीवर सतत नजर ठेवून आहे.
