परभणीकरांनी सुरेश वरपुडकरांची घराणेशाही नाकारली:कुटुंबातील 5 पैकी 4 उमेदवारांचा दारुण पराभव; केवळ पुतण्यावर विजयाचा गुलाल

जिल्हा परिषद व पंचायत समितीच्या निवडणुकीत अनेक ठिकाणी मतदारांनी राजकारण्यांची थोपली जाणारी घराणेशाही नाकारली आहे. परभणी जिल्ह्यातील निवडणुकीत मतदारांनी भाजप नेते तथा माजी मंत्री सुरेश वरपुडकर यांच्या कुटुंबातील 5 पैकी 4 उमेदवारांचा पराभव करून वरपुडकरांना जोरदार झटका दिला आहे. या निवडणुकीत वरपुडकर यांच्या केवळ एका पुतण्याचा विजय झाला आहे. त्यांनी काँग्रेसच्या तिकिटावर निवडणूक लढवली होती. यासंबंधीच्या माहितीनुसार, सुरेश वरपुडकर यांच्या कन्या सोनल देशमुख ह्या झरी जिल्हा परिषद गटातून उद्धव ठाकरे यांच्या नेतृत्वातील शिवसेना उद्धव बाळासाहेब ठाकरे पक्षाकडून निवडणुकीच्या रिंगणात उतरल्या होत्या. त्यांचा भजाप उमेदवार दिलीप देशमुख यांनी पराभव केला. वरपुडकरांचे चिरंजीव समशेर वरपुडकर हे शिंगणापूर जिल्हा परिषद गटातून उभे होते. त्यांचाही ठाकरे गटाच्या पांडुरंग खिल्लारे यांनी पराभव केला. सुरेश वरपुडकर यांच्या स्नुषा प्रेरणा वरपुडकर या ही दैठणा जिल्हा परिषद गटातून निवडणुकीच्या मैदानात उतरल्या होत्या. त्यांचा काँग्रेस उमेदवार ज्योत्स्ना गणेश घाडगे यांनी पराभव केला. दुसरीकडे, लोहगाव जिल्हा परिषद गटात सुरेश वरपुडकरांचे 2 पुतणे निवडणूक लढवत होते. त्यातील काँग्रेसच्या तिकिटावर उभ्या राहिलेल्या अजित वरपुडकर यांचा विजय झाला. त्यांनी भाजपचे आपले प्रतिस्पर्धी उमेदवार ऐश्वर्य वरपुडकर यांचा पराभव केला. यामुळे सुरेश वरपुडकर यांना मोठा दिलासा. पण त्यांच्या कुटुंबातील 5 पैकी 4 जणांना पराभवाची चव चाखावी लागल्यामुळे परभणीच्या मतदारांनी त्यांची घराणेशाही नाकारल्याचे चित्र आहे. सुरेश वरपुडकरांना राजकीय धक्का कुटुंबातील 4 उमेदवारांचा पराभव झाल्यामुळे माजी मंत्री सुरेश वरपूडकर यांना चांगलाच धक्का बसला आहे. नुकत्याच झालेल्या महानगरपालिकेच्या निवडणुकीमध्ये सुरेश वरपूडकर यांच्या पत्नीचा विजय झाला होता. त्यानंतर जिल्हा परिषदेच्या निवडणुकीतही त्यांनी आपल्या घरातील अधिकाधिक उमेदवार देण्याचा प्रयत्न केला होता, पण त्यांच्या या प्रयत्नाला आता अपयश आले आहे मतदार घराणेशाही नाकारत असल्याचे चित्र उल्लेखनीय बाब म्हणजे नगरपालिका निवडणुकीत लोहगाव नगरपालिकेत एकाच घरातील पाच जणांना उमेदवारी देण्यात आली होती आणि त्या पाचही जणांचा पराभव झाला होता ही बातमी राज्यभर चर्चिली गेली होती. त्यानंतर परभणीमध्येही असाच प्रकार माजी मंत्र्याने केल्यानंतर मात्र पुन्हा एकदा मतदारांनी त्यांना घरचा रस्ता दाखवला आहे. यामुळे मतदार राजा हा घराणेशाहीला नाकारत असल्याचे स्पष्ट झाले आहे.